കോട്ടയം: ജില്ലയിൽ ലക്ഷങ്ങള്‍ മുടക്കി നിർമ്മിച്ചതാണ്, ഒന്നല്ല മൂന്നെണ്ണം , പക്ഷെ സ്ത്രീകള്‍ക്കെന്ത് പ്രയോജനം. ആർക്കെങ്കിലും ശങ്ക തോന്നിയാല്‍ വ്യാപാരസ്ഥാപനങ്ങളാണ് ശരണം.
ദിനംപ്രതി നൂറുകണക്കിന് സ്ത്രീ യാത്രക്കാർ വന്നു പോകുന്ന കോട്ടയം നഗരമദ്ധ്യത്തില്‍ നിർമ്മിച്ച ഷീ ടോയ്ലെറ്റ് (വനിതകളുടെ കൂട്ടുകാരി) ആണ് മാസങ്ങളായി പൂട്ടികിടക്കുന്നത്.
പ്രാഥമിക ആവശ്യങ്ങള്‍ നിറവേറ്റുന്നതിനായി നഗരത്തില്‍ യാതൊരുവിധ സംവിധാനങ്ങളും ക്രമീകരിച്ചിട്ടില്ല. തിരുനക്കര മൈതാനം, നാഗമ്പടം ബസ് സ്റ്റാൻഡ്, പഴയപൊലീസ് സ്റ്റേഷൻ മൈതാനം എന്നിവിടങ്ങളിലാണ് ഷീടോയ്ലെറ്റുകള്‍ സ്ഥാപിച്ചിരിക്കുന്നത്. നഗരസഭയുടെ വികസന ഫണ്ടില്‍ നിന്ന് 25 ലക്ഷം രൂപ ചെലവഴിച്ചായിരുന്നു നിർമ്മാണം. ഇടക്കാലത്ത് തുറന്നു പ്രവർത്തിച്ചിരുന്നു. ഉപയോഗിക്കുന്നവരുടെ എണ്ണം കുറഞ്ഞതിനെ തുടർന്ന് വീണ്ടും പൂട്ട് വീണു. ബഡ്ജറ്റില്‍ നവീകരണ പ്രവർത്തനങ്ങള്‍ക്കായി നഗരസഭ ലക്ഷങ്ങള്‍ നീക്കിവച്ചെങ്കിലും പ്രാരംഭനടപടികള്‍ പോലും തുടങ്ങാനായില്ല.
ആധുനിക സജ്ജീകരണങ്ങളോടുകൂടിയ ടോയ്ലെറ്റുകളാണ് പൂട്ടിക്കിടക്കുന്നത്. റാംപ് ഉള്‍പ്പെടെയുള്ളവ സ്ഥാപിച്ചിട്ടുണ്ട്. യാത്രക്കാർ മാത്രമല്ല, നഗരത്തിലെ ചെറുകിട സ്ഥാപനങ്ങളിലെ സ്ത്രീ ജീവനക്കാർ ഉള്‍പ്പെടെയുള്ളവർ ആശ്രയിക്കുന്നത് ഈ ടോയ്ലെറ്റുകളെയായിരുന്നു. നിലവില്‍ ടേക്ക് എ ബ്രേക്ക്, കെ.എസ്.ആർ.ടി.സി സ്റ്റാൻഡ് എന്നിവിടങ്ങളെ ആശ്രയിക്കാമെങ്കിലും വൃത്തിഹീനമായ നിലയിലാണ്.
