തേനി: റോഡില്‍ ഗതാഗതം തടസപ്പെടുത്തി ദീപാവലി ആഘോഷം നടത്തുന്നത് ചോദ്യം ചെയ്‌ത പൊലീസ് സബ് ഇൻസ്‌പെക്‌ടറെ കൊലപ്പെടുത്തി നാലംഗ സംഘം.
തമിഴ്‌നാട്ടിലെ തേനി ജില്ലയിലെ സമാധ‌ർമ്മപുരത്താണ് ഞെട്ടിക്കുന്ന സംഭവം. സ്‌പെഷ്യല്‍ സബ് ഇൻസ്‌പെക്‌ടറായ സെന്തില്‍ കുമാറാണ് അടിയേറ്റ് മരിച്ചത്.
ദീപാവലി ദിവസം രാത്രിയിലായിരുന്നു സംഭവം. സമാധർമ്മപുരിയില്‍ മദ്യലഹരിയില്‍ ഒരുസംഘം ആളുകള്‍ റോഡ് ഗതാഗതം തടസപ്പെടുത്തി പടക്കം പൊട്ടിച്ച്‌ ദീപാവലി ആഘോഷം നടത്തുകയായിരുന്നു.
ഇതിന്റെ ദൃശ്യങ്ങള്‍ ഇവർ സോഷ്യല്‍ മീഡിയയില്‍ ചിത്രീകരിക്കുകയും ചെയ്തു. ഇത് സ്ഥലത്തെത്തിയ സെന്തില്‍ കുമാർ ചോദ്യം ചെയ്തു.
ഇതോടെ വഴക്കാകുകയും സംഘം സെന്തില്‍ കുമാറിനെ മർദ്ദിച്ച്‌ കൊലപ്പെടുത്തുകയുമായിരുന്നു.
സംഭവത്തില്‍ പങ്കുള്ള നാലുപേരെ പൊലീസ് അറസ്റ്റ് ചെയ്തു. കൂടുതല്‍ അന്വേഷണം നടക്കുകയാണെന്നാണ് വിവരം.
