കൊച്ചി: പൊലീസ് ഉദ്യോഗസ്ഥരെ ആക്രമിച്ച കേസില്‍ മൂന്ന് പേർ അറസ്റ്റില്‍.
ഞാറയ്ക്കല്‍ വളകടവ് വട്ടത്തറ വീട്ടില്‍ പ്രജിത്ത് (മുന്ന 35), ഇയാളുടെ സഹോദരൻ പ്രജീഷ് (36) കടമക്കുടി നികത്തിത്തറ വീട്ടില്‍ രാഗിൻ (32), എന്നിവരെയാണ് ഞാറയ്ക്കല്‍ പൊലീസ് അറസ്റ്റ് ചെയ്തത്.
ചെവ്വാഴ്ച രാത്രി എളങ്കുന്നപ്പുഴ ഭാഗത്തുള്ള പെട്രോള്‍ പമ്പിലായിരുന്നു സംഭവം. പമ്പില്‍ അടിപിടി നടക്കുന്നുണ്ടെന്ന വിവരം ലഭിച്ചതനുസരിച്ച്‌ സ്ഥലത്തെത്തിയ എസ്‌ഐ ജിതിനെയും കൂടെ ഉണ്ടായിരുന്ന പൊലീസ് ഉദ്യോഗസ്ഥനായ രഗീഷിനെയും കുത്തിയും വടികൊണ്ടടിച്ചും ഗുരുതരമായി പരിക്കേല്‍പ്പിക്കുകയായിരുന്നു.
പ്രജിത്ത്, രാഗിൻ എന്നിവർ റിഡിലീസ്റ്റില്‍ ഉള്‍പ്പെട്ടവരാണ്. പ്രജിത്ത് ഞാറയ്ക്കല്‍, മുനമ്പം, മട്ടാഞ്ചേരി, വിയ്യൂർ എന്നീ പൊലീസ് സ്റ്റേഷനുകളിലെ 22 കേസുകളില്‍ ഉള്‍പ്പെട്ടിട്ടുള്ളയാളാണ്.
രാഗിന് വരാപ്പുഴ, ചേരാനല്ലൂർ, ഞാറയ്ക്കല്‍ എന്നിവിടങ്ങളിലായി ഏഴ് കേസുകള്‍ ഉള്ളതായും പൊലീസ് പറഞ്ഞു. പ്രജീഷിനെതിരെ വേറെ ഒരു കേസും നിലവിലുണ്ട്.
ജില്ലാ പൊലീസ് മേധാവി കെ എസ് സുദർശൻ്റെ മേല്‍നോട്ടത്തില്‍ മുനമ്പം ഡിവൈഎസ്പി എസ് ജയകൃഷ്ണൻ, ഇൻസ്പെക്ടർ കെ കെ ഷെബാബ് എന്നിവരുടെ നേതൃത്വത്തിലാണ് കേസ് അന്വേഷിച്ചത്.
