കൊല്ലം: കടയ്ക്കലില്‍ രണ്ട് പോക്സോ കേസുകളില്‍ റിമാൻഡില്‍ കഴിയുന്ന മദ്രസാ അധ്യാപകനെതിരെ വീണ്ടും പോക്സോ കേസ്.
കടയ്ക്കല്‍ ഊന്നൻകല്ല് സ്വദേശിയായ 62 വയസ്സുള്ള ഇമ്പിച്ചിക്കോയയെ പൊലീസ് കസ്റ്റഡിയില്‍ വാങ്ങി തെളിവെടുപ്പ് നടത്തി. ഏഴ് വയസ്സുള്ള അതിജീവിതയെ അശ്ലീല വീഡിയോ കാണിച്ചെന്ന മൊഴിയുടെ അടിസ്ഥാനത്തിലാണ് മൂന്നാമത്തെ കേസ്.
മദ്രസയില്‍ പഠിക്കാൻ എത്തിയ എട്ടും, ഒൻപതും വയസ്സുള്ള കുട്ടികള്‍ക്ക് നേരെ ലൈംഗികാതിക്രമം നടത്തിയെന്ന രണ്ട് കേസുകളിലാണ് 62 കാരനായ ഇമ്പിച്ചിക്കോയ റിമാൻഡില്‍ കഴിയുന്നത്. മദ്രസയിലെ കൂടുതല്‍ കുട്ടികള്‍ക്ക് നേരെ അധ്യാപകനായ പ്രതി അതിക്രമം നടത്തിയിട്ടുണ്ടെന്ന് പൊലീസിന് വിവരം ലഭിച്ചിരുന്നു.
കുട്ടികളെ ചൈല്‍ഡ് ലൈനിന്റെ സഹായത്തോടെ കൗണ്‍സിലിംഗിന് വിധേയമാക്കി.
കൗണ്‍സിലിംഗിലാണ് പ്രതി അശ്ലീല വീഡിയോ കാണിച്ചിട്ടുണ്ടെന്ന് ഏഴ് വയസ്സുള്ള അതിജീവിത മൊഴി നല്‍കിയത്. തുടർന്ന് പ്രതിക്കെതിരെ മൂന്നാമത്തെ പോക്സോ കേസും എടുത്തു.
ആദ്യ രണ്ട് കേസുകളില്‍ റിമാൻഡില്‍ കഴിഞ്ഞു വന്ന പ്രതിയെ ജയിലിലെത്തിയാണ് മൂന്നാമത്തെ കേസില്‍ അറസ്റ്റ് ചെയ്തത്. കസ്റ്റഡിയില്‍ വാങ്ങിയ പ്രതിയുമായി പൊലീസ് തെളിവെടുപ്പ് നടത്തി.
കൂടുതല്‍ കുട്ടികള്‍ക്കെതിരെ പ്രതി ലൈംഗികാതിക്രമം നടത്തിയിട്ടുണ്ടോ എന്ന് അന്വേഷിക്കുമെന്ന് പൊലീസ് വ്യക്തമാക്കി
