പത്തനംതിട്ട: പത്തനംതിട്ടയില്‍ കുട്ടികളെ തട്ടിക്കൊണ്ടു പോകാൻ ശ്രമം നടന്നിട്ടില്ലെന്ന് ജില്ലാ പൊലീസ് മേധാവി ആർ. ആനന്ദ്.
കാറിലുണ്ടായിരുന്നവർ കുട്ടികള്‍ക്ക് ലിഫ്റ്റ് നല്‍കാൻ ശ്രമിച്ചതാണെന്നാണ് പ്രാഥമികമായ അന്വേഷണത്തില്‍ കണ്ടെത്തിയതെന്നും തുടർച്ചയായി കൊടുമണ്ണിലും പഴകുളത്തും സമാനമായ സംഭവങ്ങള്‍ ഉണ്ടായതിനാല്‍ കൂടുതല്‍ അന്വേഷണം നടത്തുമെന്നും അദ്ദേഹം പറഞ്ഞു.
കഴിഞ്ഞ ദിവസമാണ് പത്തനംതിട്ട പഴകുളത്തും കൊടുമണ്ണിലും കുട്ടികളെ തട്ടിക്കൊണ്ടു പോകാൻ ശ്രമിച്ചെന്ന ആരോപണമുയർന്നത്. ഇന്ന് രാവിലെ കുട്ടികളെ തട്ടി കൊണ്ട് പോകാൻ ശ്രമിച്ചു എന്ന് കരുതുന്ന കാറിന്റെ സിസിടിവി ദൃശ്യങ്ങളും പുറത്തു വന്നിരുന്നു.
ഇതോടെ കുട്ടികളെ തട്ടി കൊണ്ട് പോകാൻ ശ്രമിച്ചത് അല്ലന്നും, ലിഫ്റ്റ് കൊടുക്കാൻ ശ്രമിച്ചതാണെന്നും കാറില്‍ ഉണ്ടായിരുന്ന യുവതി വെളിപ്പെടുത്തി.
താനും ഭർത്താവും ആണ് വണ്ടിക്കുള്ളില്‍ ഉണ്ടായിരുന്നത്. തങ്ങള്‍ ആ വഴി പോകുന്നതിന് ഇടയില്‍ കുട്ടികളെ കണ്ടു. റോഡില്‍ ചെളിവെള്ളം കെട്ടിക്കിടക്കുന്നതിനാല്‍ കുട്ടികളെ അപ്പുറത്ത് എത്തിക്കാം എന്ന് പറയുക മാത്രമാണ് ചെയ്തതെന്നും അത് ബന്ധുവിന്റെ കാറായിരുന്നെന്നും യുവതി പറഞ്ഞു.
തങ്ങള്‍ ആ പ്രദേശത്ത് ഉള്ളവർ തന്നെയാണ്. തട്ടിക്കൊണ്ടു പോകാൻ ശ്രമിച്ചുവെന്ന വാർത്ത തെറ്റാണെന്നും, കൈയില്‍ പിടിച്ചു വലിച്ചുവെന്ന് പറഞ്ഞത് ശരിയല്ലെന്നും യുവതി പറഞ്ഞത്.
തുടർന്ന് നടത്തിയ പ്രാഥമിക അന്വേഷണത്തില്‍ ഇത് രണ്ടും തട്ടി കൊണ്ടുപോകാനുള്ള ശ്രമമല്ലെന്ന് സ്ഥിരികരിക്കുകയായിരുന്നെന്ന് അദ്ദേഹം പറഞ്ഞു.
