കുമരകം: മൂന്ന് വർഷത്തെ യാത്രാദുരിതത്തിനൊടുവില്‍ ഗതാഗതത്തിനായി തുറന്നുകൊടുത്ത കോണത്താറ്റ് പാലത്തില്‍ വീണ്ടും ആശങ്ക.
കോട്ടയം-കുമരകം റോഡിലെ പാലം തുറന്ന് ഒരു വർഷം പിന്നിടുമ്പോഴേക്കും കിഴക്കേക്കരയിലെ സമീപനപാത ഒരടി താഴ്ന്നു. നിർമാണത്തിലെ അപാകത പരിഹരിക്കപ്പെടാത്തതോടെ പാലത്തിലൂടെ വാഹനങ്ങള്‍ കയറുന്നതിനും ഇറങ്ങുന്നതിനും ബുദ്ധിമുട്ട് നേരിടുകയാണ്. സമീപനപാത താഴ്ന്നത് വലിയ അപകടങ്ങള്‍ക്ക് കാരണമാകുമെന്ന ആശങ്കയും ശക്തമാണ്.
പാലത്തില്‍നിന്ന് സമീപനപാതയിലേക്ക് ഇറങ്ങുന്ന വലിയ വാഹനങ്ങളുടെ അടിഭാഗം റോഡില്‍ ഇടിക്കുന്ന സ്ഥിതിയുണ്ട്. പാലത്തിലേക്ക് കയറുമ്പോള്‍ ചില വാഹനങ്ങളുടെ മുൻവശത്തെ ടയറുകള്‍ പാലത്തിന്റെ ഭാഗത്ത് ഇടിക്കുകയും വാഹനം ഉയരുകയും ചെയ്യുന്നു. പാലത്തില്‍നിന്ന് കുത്തനെ ഇറങ്ങുമ്പോഴും പാലത്തിലേക്ക് കയറുമ്പോഴും വാഹനങ്ങളുടെ നിയന്ത്രണം നഷ്ടപ്പെട്ടാല്‍ അപകടമുണ്ടാകാനുള്ള സാധ്യത കൂടുതലാണ്. പാലം ഗതാഗതത്തിനായി തുറന്നുകൊടുത്ത ദിവസം മുതല്‍ സമീപനപാത താഴ്ന്നുവരുന്നതായാണ് റിപ്പോർട്ട്.
വിനോദസഞ്ചാര സീസണ്‍ ആരംഭിച്ചതോടെ വിദേശ സഞ്ചാരികള്‍ ഉള്‍പ്പെടെ നിരവധി പേർ കുമരകത്തേക്ക് എത്തുന്നുണ്ട്. ദൂരസ്ഥലങ്ങളില്‍നിന്ന് എത്തുന്ന ഡ്രൈവർമാർക്ക് സമീപനപാതയുടെ അപകടാവസ്ഥ മുൻകൂട്ടി മനസ്സിലാക്കാൻ കഴിയണമെന്നില്ല. ഇതോടെ അപകടസാധ്യത കൂടുതല്‍ വർധിക്കുന്നു. തിരക്കേറിയ വിനോദസഞ്ചാര പാതയില്‍ സമീപനപാതയുടെ നിലവിലെ അവസ്ഥ വാഹനയാത്രക്കാർക്ക് വലിയ വെല്ലുവിളിയാണ്.
മൂന്ന് വർഷത്തെ കാത്തിരിപ്പിനും യാത്രാദുരിതത്തിനും ശേഷമാണ് കോണത്താറ്റ് പാലം ഗതാഗതത്തിനായി തുറന്നത്. എന്നാല്‍, ഒരു വർഷത്തിനുള്ളില്‍ സമീപനപാത താഴ്ന്നത് നിർമാണത്തിന്റെ ഗുണനിലവാരത്തെക്കുറിച്ചും അറ്റകുറ്റപ്പണികളുടെ ആവശ്യകതയെക്കുറിച്ചും ചോദ്യങ്ങളുയർത്തുന്നു. അപകടങ്ങള്‍ സംഭവിക്കുന്നതിന് മുമ്പ് പ്രശ്നം പരിഹരിക്കാൻ അധികൃതർ നടപടി സ്വീകരിക്കണമെന്നാണ് യാത്രക്കാരുടെ ആവശ്യം.
