വൈക്കം: നഗരസഭ പരിധിയിലെ 38 ഏക്കർ വിസ്തൃതിയുള്ള നാറാണത്ത് ബ്ലോക്ക് കൃഷിയോഗ്യമാക്കുന്നതിനായി കുട്ടനാടു പാക്കേജില് ഉള്പ്പെടുത്തി പദ്ധതി വിഭാവനം ചെയ്യുന്നു.
വർഷങ്ങളായി കൃഷി ചെയ്യാതെ പുല്ലും പോളയും കുറ്റി ച്ചെടികളും വളർന്ന് തിങ്ങിയ നിലയിലാണ് നാറാണത്ത് പാടശേഖരമിപ്പോള്. പാടശേഖരത്തിലെ കാട് തെളിച്ച് പുറബണ്ട് തകർന്ന ഭാഗങ്ങളില് ബണ്ട് ബലപ്പെടുത്തി പുതിയ പെട്ടിയും പറയും സ്ഥാപിക്കുന്നതടക്കമുള്ള പ്രവർത്തനങ്ങള്ക്കായി 75 ലക്ഷം രൂപയുടെ പദ്ധതിയാണ് തയാറാക്കിയിട്ടുള്ളത്.
38 ഏക്കർ വരുന്ന പാടശേഖരത്തില് 30ഓളം കർഷകരുണ്ട്. പുറബണ്ട് ചില സ്ഥലങ്ങളില് തകർന്നതും ശുദ്ധജല ലഭ്യതക്കുറവുമാണ് കർഷകർക്ക് തിരിച്ചടിയാത്.
ഭൗതിക സാഹചര്യങ്ങളുടെ അപര്യാപ്തമൂലം കർഷകർ കൃഷിയില് നിന്ന് പിൻവാങ്ങുകയായിരുന്നു.
ഇറിഗേഷൻ അധികൃതർ എസ്റ്റിമേറ്റെടുത്തു. ജില്ലാ പ്ലാനിംഗ് ഓഫിസറും തുടർ നടപടി സ്വീകരിച്ചു.
ഏതാനും മാസങ്ങള്ക്കുള്ളില് നടപടിക്രമങ്ങള് പൂർത്തിയാക്കി നാറാണത്തു ബ്ലോക്ക് കൃഷിയോഗ്യമാക്കാനുള്ള പ്രവർത്തനങ്ങള് ആരംഭിക്കാനാകുമെന്ന പ്രതീക്ഷയിലാണ് നഗരസഭ അധികൃതർ. വളരെ ഉയരത്തില് പുല്ലും കുറ്റിച്ചെടികളും വളർന്ന പാടശേഖരം വിഷപ്പാമ്പുകളുടെ ആവാസകേന്ദ്രമായി.
പാടശേഖരത്തിന് ചുറ്റുമായി 30ഓളം വീടുകളുണ്ട്. വീടുകളുടെ ഉള്ളിലേക്ക് മൂർഖനും അണലിയുമൊക്കെ ഇഴഞ്ഞെത്തുന്നത് പതിവായതോടെ പ്രദേശവാസികളും കടുത്ത ഭീതിയിലാണ്.





