പൊടിമറ്റം: ഒരു മേഖലയിൽ ഒരുമിച്ച് താമസിക്കുന്ന കുടുംബങ്ങൾ പരസ്പര ഐക്യത്തോടെയും കൂട്ടായ്മയോടെയും പ്രവർത്തിക്കുന്നത് സാമൂഹികവും കുടുംബപരവുമായ ബന്ധങ്ങൾ ശക്തിപ്പെടുത്താൻ സഹായിക്കുമെന്ന് എം.ജെ. സെബാസ്റ്റ്യൻ എംഎൽഎ. കാഞ്ഞിരപ്പള്ളി പൊടിമറ്റം കൈരളി റെസിഡന്റ്സ് വെൽഫെയർ സൊസൈറ്റിയുടെ ഓണാഘോഷ പരിപാടികൾ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
2005 മുതൽ പൊടിമറ്റത്ത് പ്രവർത്തിക്കുന്ന അസോസിയേഷന്റെ ഓണാഘോഷത്തിന് പ്രസിഡന്റ് ജോർജ്കുട്ടി വളയത്തിൽ അധ്യക്ഷത വഹിച്ചു. പൊടിമറ്റം സെന്റ് മേരീസ് പള്ളി വികാരി ഫാ. വർഗീസ് പുതുപ്പറമ്പിൽ, സിസ്റ്റർ സിൽവി, ഫാ. ദീപു കിടങ്ങത്താഴയിൽ, ജോജി വാളിപ്ലാക്കൽ, മിനി ട്രീസ ഐക്കരയിൽ, ഡെമിലി ബിജു ഉറുമ്പുനിരപ്പേൽ, എബ്രഹാം നെല്ലുവേലി, ജോസഫ് വെട്ടിക്കാട്ട്, അവിരാച്ചൻ പൊട്ടംകുളം തുടങ്ങിയവർ പ്രസംഗിച്ചു.
വിവിധ മേഖലകളിൽ നേട്ടങ്ങൾ കൈവരിച്ച ജമീല ടീച്ചർ, ജോൺ പ്ലാമൂട്ടിൽ എന്നിവരെയും അസോസിയേഷനിലെ പഞ്ചായത്ത് മെമ്പർ ജാക്വിലിൻ ടീച്ചർ വളയത്തിലിനെയും എംഎൽഎ പൊന്നാടയണിയിച്ച് ആദരിച്ചു.
വിവിധ കായിക മത്സരങ്ങൾ, ആവേശകരമായ വടംവലി, വിഭവസമൃദ്ധമായ ഓണസദ്യ, സമ്മാനദാനം എന്നിവയും നടന്നു. ഓണാഘോഷ പരിപാടികൾക്ക് അസോസിയേഷൻ ഭാരവാഹികളും അംഗങ്ങളും നേതൃത്വം നൽകി.
അതേസമയം, പൊടിമറ്റം–ആനക്കല്ല് റോഡിന്റെ ശോചനീയാവസ്ഥ പരിഹരിക്കണമെന്നും മഴവെള്ളം ഒഴുകിപ്പോകുന്നതിനായി കാന നിർമിക്കണമെന്നും ആവശ്യപ്പെട്ട് അസോസിയേഷൻ എംഎൽഎയ്ക്ക് നിവേദനം നൽകി.
