കാലിഫോർണിയ: അഞ്ച് ശതമാനം ജീവനക്കാരെ പിരിച്ചുവിടാൻ ഒരുങ്ങി നെറ്റ്‌ഫ്ലിക്സ്.
കാഴ്ചക്കാരുടെഎണ്ണത്തിലുണ്ടായ കുറവും ഈ വർഷം ഉടനീളം ഓഹരി വിപണിയിലുണ്ടായ ഇടിവുമാണ് ഇതിന് കാരണമെന്നാണ് അനൗദ്യോഗിക വിവരം.
അടുത്ത ആഴ്ചയോടെ ഇതുസംബന്ധിച്ച ഔദ്യോഗിക പ്രഖ്യാപനം ഉണ്ടാകും. കഴിഞ്ഞ നാല് വർഷത്തിനിടെ നെറ്റ്‌ഫ്ലിക്സ് നടത്തുന്ന ഏറ്റവും വലിയ പിരിച്ചുവിടല്‍ നടപടിയാണിത്. ഒക്ടോബർ 29ന് മുൻപ് 850 പേരെ ജോലിയില്‍ നിന്ന് പിരിച്ചുവിടാൻ സാദ്ധ്യതയുണ്ടെന്നാണ് റിപ്പോർട്ട്. ഏകദേശം 17,000 ആണ് നിലവിലെ ജീവനക്കാരുടെ എണ്ണം.
ഏതെല്ലാം വിഭാഗക്കാരെ ഇത് ബാധിക്കുമെന്ന് വ്യക്തമല്ല. കഴിഞ്ഞ ഒരു വർഷത്തിനിടെ കമ്പനിയുടെ ഓഹരി മൂല്യത്തില്‍ 40 ശതമാനമാണ് ഇടിവുണ്ടായത്. 2026ന്റെ ആദ്യ പകുതിയില്‍ ഉപയോക്താക്കളുടെ ഇടപെടല്‍ വെറും രണ്ട് ശതമാനം മാത്രമാണ് വർദ്ധിച്ചത്. ഇതാണ് പ്രതിസന്ധിക്ക് കാരണമായതെന്ന് പക്ക് റിപ്പോർട്ട് ചെയ്യുന്നു. നെറ്റ്‌ഫ്ലിക്സില്‍ മാത്രമല്ല ഡിസ്നിയിലും ഈ വർഷം പിരിച്ചുവിടല്‍ നടന്നിരുന്നു. ഡിസ്നി ഈ വർഷം മൂന്ന് തവണയാണ് ജീവനക്കാരെ പിരിച്ചുവിട്ടത്.
