തിരുവനന്തപുരം: ചൊവ്വാഴ്ച രാവിലെ മംഗലാപുരം-തിരുവനന്തപുരം മലബാര്‍ എക്‌സ്പ്രസ്സിലെ യാത്രക്കാരിയെ ട്രെയിനിനുള്ളില്‍ വച്ച് കടന്നാക്രമിക്കാന്‍ ശ്രമിച്ചിട്ടും റെയില്‍വേ പോലീസിന്റെ സംരക്ഷണം ലഭിച്ചില്ലെന്ന പരാതിയില്‍ സംസ്ഥാന മനുഷ്യാവകാശ കമ്മീഷന്‍ അന്വേഷണത്തിന് ഉത്തരവിട്ടു.
റെയില്‍വേ ഡിവിഷണല്‍ മാനേജര്‍, റെയില്‍വേ പോലീസ് സൂപ്രണ്ട്, തിരുവനന്തപുരം ജില്ലാ പോലീസ് മേധാവി എന്നിവര്‍ അന്വേഷണം നടത്തി മൂന്നാഴ്ചക്കം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ് ആവശ്യപ്പെട്ടു.
ട്രെയിനിനുള്ളില്‍ അക്രമ സംഭവങ്ങള്‍ ആവര്‍ത്തിക്കുമ്പോഴും റെയില്‍വേ പോലീസ് നോക്കുകുത്തിയായിമാറുകയാണെന്ന് പരാതിക്കാരനായ പൊതു പ്രവര്‍ത്തകന്‍ പി.കെ രാജു സമര്‍പ്പിച്ച പരാതിയില്‍ പറഞ്ഞു.
ചൊവ്വാഴ്ച രാവിലെ ചിറയിൻകീഴിൽ നിന്നും തിരുവനന്തപുരത്തേക്ക് യാത്ര ചെയ്യുകയായിരുന്ന 25-കാരിയായ യുവതിക്ക് നേരെയാണ് മലബാർ എക്‌സ്പ്രസ്സിൽ വച്ച് ലൈംഗികാതിക്രമം ഉണ്ടായത്. പേട്ട സ്റ്റേഷനിൽ ഇറങ്ങിയ യുവതി പോലീസിൽ പരാതിപ്പെടുമെന്ന് പറഞ്ഞപ്പോൾ പ്രതി മുഖത്തടിക്കുകയും യുവതി ബോധരഹിതയായി വീഴുകയും ചെയ്തു.
സംഭവത്തിന് പിന്നാലെ യാത്രക്കാരും നാട്ടുകാരും ചേർന്ന് ആറ്റിങ്ങൽ സ്വദേശിയായ വിജേഷ് (39) എന്ന പ്രതിയെ പിടികൂടി തമ്പാനൂർ റെയിൽവേ പോലീസിന് കൈമാറുകയും പോലീസ് ഇയാളെ അറസ്റ്റ് ചെയ്ത് റിമാൻഡ് ചെയ്യുകയും ചെയ്തിരുന്നു.
