കുമരകം: എസ്.കെ.എം. പബ്ലിക് സ്കൂൾ സീനിയർ സെക്കൻഡറിയിൽ എൽ.കെ.ജി. മുതൽ രണ്ടാം ക്ലാസ് വരെയുള്ള കുരുന്നുകൾക്കായി കിഡ്സ് ഫെസ്റ്റ് സംഘടിപ്പിച്ചു. കുട്ടികളുടെ സർഗാത്മകവും കലാപരവുമായ കഴിവുകൾ പ്രകടിപ്പിക്കുന്നതിനും ആത്മവിശ്വാസം വളർത്തുന്നതിനുമുള്ള മികച്ച വേദിയായി കിഡ്സ് ഫെസ്റ്റ് മാറി.
സ്കൂൾ മാനേജർ അഡ്വ. എം. എൻ. പുഷ്കരൻ അധ്യക്ഷത വഹിച്ച ചടങ്ങിൽ പ്രിൻസിപ്പൽ അനീഷ് കെ. ചെറിയാൻ സ്വാഗതം ആശംസിച്ചു. കുമരകം എസ്.കെ.എം. ഹയർ സെക്കൻഡറി സ്കൂൾ പ്രിൻസിപ്പൽ എസ്.സുനിമോൾ ചടങ്ങിൽ മുഖ്യാതിഥിയായി പങ്കെടുത്ത് കിഡ്സ് ഫെസ്റ്റിന്റെ ഔപചാരിക ഉദ്ഘാടനം നിർവഹിച്ചു. എസ്.കെ.എം. പബ്ലിക് സ്കൂളിലെ പൂർവ്വവിദ്യാർത്ഥിനിയായ ഡോ. അനഘ ഷിജി വിശിഷ്ടാതിഥിയായി പങ്കെടുത്തു.
കുട്ടികളുടെ പ്രായത്തിനും അഭിരുചിക്കും അനുയോജ്യമായ വിവിധ കലാമത്സരങ്ങൾ ഫെസ്റ്റിന്റെ ഭാഗമായി നടന്നു. കുരുന്നുകളുടെ ഫാൻസി ഡ്രസ്, ഫോക്ക് ഡാൻസ് മത്സരങ്ങൾ ഏറെ വർണ്ണാഭവും ആകർഷകവുമായിരുന്നു. വൈവിധ്യമാർന്ന വേഷപ്പകർച്ചകളിലൂടെയും ചുവടുകളിലൂടെയും കുട്ടികൾ തങ്ങളുടെ കഴിവുകൾ മനോഹരമായി അവതരിപ്പിച്ചു.
കുട്ടികളുടെ കലാപ്രകടനങ്ങൾ ആസ്വദിക്കാൻ രക്ഷിതാക്കളും എത്തിയിരുന്നു. അധ്യാപകരുടെയും രക്ഷിതാക്കളുടെയും സഹപാഠികളുടെയും നിറഞ്ഞ പ്രോത്സാഹനം കുരുന്നുകൾക്ക് ആവേശമായി. കുട്ടികളുടെ സർഗാത്മകതയ്ക്കും ആത്മവിശ്വാസത്തിനും പ്രാധാന്യം നൽകുന്ന മനോഹരമായ അനുഭവമായി കിഡ്സ് ഫെസ്റ്റ് മാറി.
