ചങ്ങനാശേരി: സെൻസർ തകരാർമൂലം ചങ്ങനാശേരിയിൽനിന്നുള്ള തിരുനെൽവേലി ബസ് സർവീസ് തുടർച്ചയായി മുടങ്ങുന്നു. യാത്രക്കാർ ദുരിതത്തിൽ.
തിരുനെൽവേലി സർവീസ് നടത്തുന്ന കെ.എസ്-630 സ്വിഫ്റ്റ് ബസാണ് സെൻസർ തകരാർമൂലം യാത്രക്കാരെ വലയ്ക്കുന്നത്. കെ.എസ്.ആർ.ടി.സി. ഡിപ്പോകളിൽ സ്വിഫ്റ്റ് ബസുകളുടെ സെൻസർ തകരാറുകൾ പരിഹരിക്കാനുള്ള സംവിധാനം ഇല്ലാത്തതിനാലും ബസിന്റെ വാറന്റി കാലാവധി കഴിയാത്തതിനാലും തകരാർ പരിഹരിക്കാൻ ആലുവയിലെ ഷോറൂമിലേക്ക് മാറ്റിയിരിക്കുകയാണ്.
ദിവസേന രാവിലെ 7.15-ന് ചങ്ങനാശേരിയിൽനിന്ന് പുറപ്പെട്ട് തിരുവല്ല, അടൂർ, പത്തനാപുരം, പുനലൂർ, ചെങ്കോട്ട വഴി ഉച്ചയ്ക്ക് 1.30-ന് തിരുനെൽവേലിയിലെത്തി, തിരികെ 2.50-ന് പുറപ്പെട്ട് കോട്ടയത്തെത്തി, തിരികെ രാത്രി പത്തിന് ചങ്ങനാശേരിയിൽ സമാപിക്കുന്ന സർവീസാണിത്. നല്ല വരുമാനമുള്ള ഈ സർവീസാണ് അധികൃതരുടെ അനാസ്ഥയിൽ താളംതെറ്റുന്നത്. വിവിധ സ്ഥാപനങ്ങളിലെ ഉദ്യോഗസ്ഥരും വ്യാപാരികളുമടക്കം ആശ്രയിക്കുന്ന ബസാണ്. പഴയ ബസ് മാറ്റി ഒരു വർഷം മുമ്പാണ് ഈ സർവീസിനായി സ്വിഫ്റ്റ് ബസ് അനുവദിച്ചത്. അന്നു മുതൽ തകരാറും ആരംഭിച്ചു. ഈ ബസ് സർവീസ് ഇപ്പോൾ മുടങ്ങിയിട്ട് ഒരാഴ്ചയിലേറെയായി.
ഷോറൂമിൽനിന്നും ബസ് സർവീസിന് യോഗ്യമാക്കി തരുന്നതിനുള്ള കാലതാമസമാണ് സർവീസ് നടത്തിപ്പിനെ ബാധിച്ചിരിക്കുന്നതെന്ന് അധികൃതർ പറയുന്നു. മുൻകാലങ്ങളിൽ കോട്ടയം ഡിപ്പോയിൽനിന്നും ഇന്റർസ്റ്റേറ്റ് പെർമിറ്റുള്ള ബസ് എത്തിച്ച് സർവീസ് നടത്തി പ്രശ്നങ്ങൾ പരിഹരിച്ചിരുന്നു.
ഇന്റർസ്റ്റേറ്റ് ബസ് ലഭിക്കാതെ വരുമ്പോൾ ഫാസ്റ്റ് ബസ് പുനലൂർ അല്ലെങ്കിൽ ആര്യങ്കാവ് വരെ നടത്തി അവസാനിപ്പിക്കുകയാണ് പതിവ്. ഇത് തെന്മലയ്ക്കും തിരുനെൽവേലിക്കും പോകേണ്ട യാത്രക്കാർക്ക് ബുദ്ധിമുട്ടുണ്ടാക്കുന്നു.
