പാലക്കാട്: കൊഴിഞ്ഞാമ്പാറയില്‍ രണ്ട് കുഞ്ഞുങ്ങളെ വെള്ളത്തില്‍ മുക്കി കൊലപ്പെടുത്തിയ കേസില്‍ പ്രതിയായ അമ്മയുടെ സുഹൃത്തും പിടിയില്‍.
മേനോൻപാറ പാറക്കുഴി പട്ടമരത്താർ വീട്ടില്‍ എ. മാർട്ടിൻ ഇഗ്നേഷ്യസ് (36) ആണ് അറസ്‌റ്റിലായത്. അമ്മയുമായി നടത്തിയ തെളിവെടുപ്പിനിടെയാണ് പൊലീസിന് ഇയാളെക്കുറിച്ചുള്ള സൂചനകള്‍ ലഭിച്ചത്.
തുടർന്ന് ചോദ്യം ചെയ്യലില്‍ കൂടുതല്‍ വിവരങ്ങള്‍ വ്യക്തമാകുകയായിരുന്നു. അമ്മയുടെ സുഹൃത്തിൻ്റെ അറസ്റ്റ് രേഖപ്പെടുത്തി.
പ്രതിയായ അമ്മയുടെ അടുത്ത സുഹൃത്താണ് ഇഗ്നേഷ്യസ്. പ്രതിക്ക് കുട്ടികളുടെ കൊലപാതകത്തില്‍ നേരിട്ട് പങ്കുണ്ടെന്ന് പോലീസ് വ്യക്തമാക്കുന്നു.
അമ്മയും പ്രതിയുമായ നിവേദ്യയ്ക്ക് ഇയാളില്‍ നിന്ന് സഹായം ലഭിച്ചെന്ന വ്യക്തമായ വിവരമാണ് പൊലീസിന് ലഭിച്ചിരിക്കുന്നത്. തെളിവെടുപ്പിനിടെ ലഭിച്ച വിവരങ്ങള്‍ കൂടാതെ മറ്റ് നിർണായക വിവരങ്ങള്‍ കൂടി നിവേദ്യ നല്‍കിയിട്ടുണ്ടെന്നും പൊലീസ് വെളിപ്പെടുത്തുന്നു.
ഇയാളെ ഇന്നലെ തന്നെ പൊലീസ് കസ്റ്റ‍ഡിയിലെടുത്തിരുന്നു. വിശദമായി ചോദ്യം ചെയ്യലിന് ശേഷമാണ് അറസ്റ്റ് രേഖപ്പെടുത്തിയിരിക്കുന്നത്.
ഇവർ താമസിച്ചിരുന്ന വാടക കെട്ടിടത്തിന് തൊട്ടടുത്ത് തന്നെയാണ് രണ്ടാമത്തെ പ്രതിയും താമസിച്ചിരുന്നത്. ഇവർ തമ്മിലുണ്ടായിരുന്ന ബന്ധത്തിനെ തുടർന്നാണ് കൊലപാതകമെന്ന നിഗമനത്തിലാണ് പൊലീസ് എത്തിയിരിക്കുന്നത്.
അമ്മയുടെ കാമുകൻ മാർട്ടിൻ ഇഗ്നേഷ്യസിന് കൊലപാതകത്തില്‍ നേരിട്ട് പങ്കുണ്ടെന്നാണ് പൊലീസ് ഒടുവില്‍ നല്‍കുന്ന വിവരം. കൊലപാതക സമയം ഇയാള്‍ വീട്ടില്‍ ഉണ്ടായിരുന്നുവെന്നും ആരെങ്കിലും വീട്ടിലേക്ക് വരുന്നുണ്ടോ എന്ന് പരിശോധിച്ചതും ഇയാളാണെന്നും പൊലീസ് പറഞ്ഞു.
