കോട്ടയം: അന്താരാഷ്ട്ര വേദിയിൽ കേരളത്തിന്റെ അഭിമാനമായി ശ്രദ്ധേയ നേട്ടം കൈവരിച്ച റിസ്മിയയെ കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ ആദരിച്ചു.
വേൾഡ് ജൂനിയർ ടൂറിസം അംബാസഡർ 1st റണ്ണർ അപ്പ് ആയി തിരഞ്ഞെടുക്കപ്പെട്ട റിസ്മിയയ്ക്കുള്ള ആദരവ് HUG International സംഘടിപ്പിച്ച 'HUG Onam പുണർന്നോണം 2026' ആഘോഷത്തിന്റെ ഭാഗമായി തെള്ളകം ചൈതന്യ പാസ്റ്ററൽ സെന്ററിൽ നടന്ന ചടങ്ങിലാണ് നൽകിയത്.
സ്വന്തം കഴിവിനെയും താൽപര്യങ്ങളെയും പിന്തുടർന്ന് അന്താരാഷ്ട്ര വേദിയിൽ മികച്ച നേട്ടം കൈവരിച്ച റിസ്മിയയുടെ വിജയം കുട്ടികൾക്കും യുവതലമുറയ്ക്കും വലിയ പ്രചോദനമാണെന്ന് ചടങ്ങിൽ അദ്ദേഹം പറഞ്ഞു. കഴിവുകൾ തിരിച്ചറിഞ്ഞ് മകളുടെ പാഷനെ പ്രോത്സാഹിപ്പിക്കുകയും അത് ഒരു പ്രൊഫഷണൽ സാധ്യതയായി വളർത്തുന്നതിനായി പിന്തുണ നൽകുകയും ചെയ്ത റിസ്മിയയുടെ അമ്മ സൈനബാ ബീവിയെയും ചടങ്ങിൽ പ്രത്യേകമായി ആദരിച്ചു.
കുട്ടികളുടെ സർഗാത്മക കഴിവുകൾ പ്രോത്സാഹിപ്പിക്കുന്നതിന്റെ ഭാഗമായി HUG Creative Craft Exhibition-നും ചടങ്ങിനോടനുബന്ധിച്ച് സംഘടിപ്പിച്ചു. കോട്ടയം നഗരസഭ ചെയർപേഴ്സൺ ശ്രീ വി പി സന്തോഷ്കുമാർ എക്സിബിഷൻ സ്റ്റാൾ ഉദ്ഘാടനം ചെയ്തു. 4 മുതൽ 14 വയസ്സ് വരെയുള്ള കുട്ടികൾ സ്വന്തമായി നിർമ്മിച്ച വിവിധ ക്രാഫ്റ്റ് ഉൽപ്പന്നങ്ങൾ പ്രദർശിപ്പിക്കുകയും വിൽപ്പന നടത്തുകയും ചെയ്തു.
കുട്ടികളെ സ്ക്രീൻ അഡിക്ഷനിൽ നിന്ന് സർഗാത്മകതയിലേക്ക് നയിക്കുക എന്ന ലക്ഷ്യത്തോടെ HUG International നടത്തുന്ന ക്രിയേറ്റീവ് ക്രാഫ്റ്റ് പ്രവർത്തനങ്ങളുടെ ഭാഗമായാണ് പ്രദർശനം സംഘടിപ്പിച്ചത്. സ്വന്തം കഴിവുകൾ ഉപയോഗിച്ച് ഉൽപ്പന്നങ്ങൾ നിർമ്മിക്കുകയും അവ പ്രദർശിപ്പിക്കുകയും വിൽപ്പന നടത്തുകയും ചെയ്യുന്നതിലൂടെ കുട്ടികളിൽ സർഗാത്മകത, ആത്മവിശ്വാസം, സ്വയംപര്യാപ്തത, സംരംഭകത്വ ചിന്ത എന്നിവ വളർത്തുകയാണ് പദ്ധതിയുടെ ലക്ഷ്യം.
