കോട്ടയം: ഗ്രാമീണ മേഖലയിലെ യാത്രാക്ലേശത്തിന് ആശ്വാസമായി കോട്ടയം ജില്ലാ പഞ്ചായത്തിന്റെ ആദ്യ ‘ഗ്രാമവണ്ടി’ സർവീസിന് തുടക്കമാകുന്നു. കെഎസ്ആർടിസിയുമായി സഹകരിച്ച് ജില്ലാ പഞ്ചായത്ത് നടപ്പാക്കുന്ന പദ്ധതിയുടെ ഉദ്ഘാടനം 22ന് ഉച്ചകഴിഞ്ഞ് 2.30ന് ഞാലിയാകുഴിയിൽ ചാണ്ടി ഉമ്മൻ എംഎൽഎ നിർവഹിക്കും. ജില്ലാ പഞ്ചായത്ത് പ്രസിഡന്റ് ജോഷി ഫിലിപ് അധ്യക്ഷത വഹിക്കും.
കെഎസ്ആർടിസിയുടെ പ്രിയദർശിനി പദ്ധതി നടപ്പാക്കിയതിന് ശേഷമുള്ള ആദ്യ ഗ്രാമവണ്ടി എന്ന പ്രത്യേകതയും പദ്ധതിക്കുണ്ട്. 25 ലക്ഷം രൂപയാണ് ജില്ലാ പഞ്ചായത്ത് പദ്ധതിക്കായി ചെലവഴിക്കുന്നത്.
കോട്ടയം–ചങ്ങനാശേരി റൂട്ടിലാണ് ഗ്രാമവണ്ടിയുടെ സർവീസ്. രാവിലെ 7ന് കോട്ടയത്തുനിന്ന് പുറപ്പെടുന്ന ബസ് പുതുപ്പള്ളി, ഞാലിയാകുഴി, പുല്ലുകാട്ടുപടി, ജറുസലം മൗണ്ട്, വള്ളിക്കാട്ട് ദയറ, പുത്തൻചന്ത, കണ്ണഞ്ചിറ, പരപ്പാട്ടുപടി, ചീരഞ്ചിറ വഴി 8.20ന് ചങ്ങനാശേരിയിലെത്തും.
തുടർന്ന് രാവിലെ 8.30ന് ചങ്ങനാശേരിയിൽ നിന്ന് പുറപ്പെടുന്ന സർവീസ് മാമ്മൂട്, കൊച്ചുറോഡ്, പാലമറ്റം, മണ്ണാംകവല, രാജമറ്റം, വട്ടോളി, തോട്ടക്കാട് അമ്പലക്കവല, ഇരവുചിറ, ഞാലിയാകുഴി വഴി 10ന് കോട്ടയത്തെത്തും.
ഇതിന് പുറമെ കോട്ടയത്തുനിന്ന് രാവിലെ 11ന്, ഉച്ചയ്ക്ക് 3ന് സർവീസുകളുണ്ടാകും. ഈ സർവീസുകൾ യഥാക്രമം 12.20നും 4.20നും ചങ്ങനാശേരിയിലെത്തും.
ചങ്ങനാശേരിയിൽ നിന്ന് 12.45നും വൈകിട്ട് 5.10നും തിരിച്ചുള്ള സർവീസുകളുണ്ടാകും. ഇവ യഥാക്രമം ഉച്ചയ്ക്ക് 2നും വൈകിട്ട് 6.40നും കോട്ടയത്ത് തിരിച്ചെത്തും.
ഗ്രാമീണ മേഖലകളിലെ പ്രധാന കേന്ദ്രങ്ങളെ ബന്ധിപ്പിച്ച് പൊതുഗതാഗത സൗകര്യം കൂടുതൽ മെച്ചപ്പെടുത്തുക എന്ന ലക്ഷ്യത്തോടെയാണ് ജില്ലാ പഞ്ചായത്ത് കെഎസ്ആർടിസിയുമായി ചേർന്ന് ഗ്രാമവണ്ടി പദ്ധതി നടപ്പാക്കുന്നത്.
