കാഞ്ഞിരപ്പള്ളി: കാഞ്ഞിരപ്പള്ളി ടൗണിൽ അവധി ദിവസങ്ങളുടെ മറവിൽ കയ്യേറ്റവും അനധികൃത നിർമ്മാണവും വ്യാപകമാകുന്നതായി പരാതി.
കാഞ്ഞിരപ്പള്ളി ടൗണിൽ സെന്റ് ഡോമിനിക് സ്കൂൾ റോഡിൽ, പ്രധാന കവാടത്തിന് എതിർവശം പോലീസ് സ്റ്റേഷൻ, സിവിൽ സ്റ്റേഷൻ, എസ്ബിഐ ബ്രാഞ്ച് എന്നിവയിലേക്ക് കടന്നുപോകുന്ന പ്രധാന റോഡിലാണ് സംഭവം.
റോഡിൽ പ്രവർത്തിക്കുന്ന ഒരു സ്ഥാപന ഉടമ, രണ്ടാം ശനിയും ഞായറാഴ്ചയും അവധി ദിവസങ്ങളായിരുന്ന സമയത്ത്, കാഞ്ഞിരപ്പള്ളി ഗ്രാമപഞ്ചായത്തിന്റെയോ, പഞ്ചായത്ത് സെക്രട്ടറിയുടെയോ, അസിസ്റ്റന്റ് എൻജിനീയറുടെയോ അനുമതി കൂടാതെ അനധികൃതമായി മതിൽ കെട്ടുകയും കെട്ടിടത്തിന്റെ റൂഫിംഗ് വർക്കുകൾ നടത്തുകയും ചെയ്തതായാണ് ആക്ഷേപം.
തിരക്കേറിയ റോഡ് കയ്യേറി നടത്തുന്ന ഇത്തരം അനധികൃത നിർമ്മാണങ്ങൾക്കെതിരെ പഞ്ചായത്ത് ശക്തമായ നടപടി സ്വീകരിക്കണമെന്നും, നിർമ്മാണങ്ങൾ പൊളിച്ചു നീക്കണമെന്നുമാണ് നാട്ടുകാരുടെ ആവശ്യം.
