തിരുവനന്തപുരം: വിദേശത്തു തൊഴില്‍ വാഗ്ദാനം ചെയ്ത ലക്ഷങ്ങള്‍ തട്ടിയെടുത്ത സംഭവത്തില്‍ രണ്ടുപേരെ വിഴിഞ്ഞം പൊലീസ് അറസ്റ്റ് ചെയ്തു.
ഒന്നാം പ്രതി തൃശൂർ മുരിങ്ങൂർ തെക്കുമുറി കോനൂർ നാലുകെട്ടില്‍ കടവിലെ വീട്ടില്‍ ഷഫീഖ് (49), രണ്ടാം പ്രതി മലപ്പുറം നിലമ്പൂർ പടികുളത്തുംപടി വീട്ടില്‍ ഷഫ്ന (32) എന്നിവരെയാണ് പിടികൂടിയത്.
ഒന്നാം പ്രതിയെ തൃശൂർ കൊറോട്ടി ലാൻഡ് ക്ലബിന് സമീപം വെച്ചും രണ്ടാം പ്രതിയെ വീട്ടില്‍ നിന്നുമാണ് അറസ്റ്റുചെയ്തത്.
വിഴിഞ്ഞം കോട്ടപ്പുറം സ്വദേശിനി അജിതയുടെ പരാതിയിലാണ് കൊണ്ടോട്ടിയില്‍ പ്ലാനറ്റ് ആൻഡ് ടൂർസ് എന്ന സ്‌ഥാപനം നടത്തുന്ന ഷഫ്ന, ഇവിടുത്തെ ജീവനക്കാരൻ തൃശൂർ സ്വദേശി ഷഫീക്ക് എന്നിവരെ അറസ്റ്റ് ചെയ്തത്.
ഓസ്ട്രേലിയയില്‍ ജോലി വാഗ്ദാനം നല്‍കി ദമ്പതികളില്‍ നിന്ന് പലപ്പോഴായി 15,80,000 രൂപയും ഇവരുടെ ബന്ധുവില്‍ നിന്ന് 5,40,000 രൂപയും തട്ടിയതായാണ് പരാതി.
