ഏറ്റുമാനൂർ : സൂപ്പർ ഫാസ്റ്റ് ട്രെയിനുകൾ നിർത്തുന്ന ഡിവിഷനിലെ ചില സ്റ്റേഷനുകളെക്കാൾ വരുമാനത്തിൽ വലിയ നേട്ടം സ്വന്തമാക്കി ഏറ്റുമാനൂർ റെയിൽവേ സ്റ്റേഷൻ. നാമ മാത്രമായ എക്സ്പ്രസ്സ്‌ ട്രെയിനുകളുടെ സ്റ്റോപ്പുകൾ കൊണ്ടുമാത്രം കഴിഞ്ഞ വർഷം തന്നെ ഒന്നരക്കോടിയുടെ നേട്ടം ഏറ്റുമാനൂർ സ്റ്റേഷൻ സ്വന്തമാക്കി. അമൃത് ഭാരത്‌ പദ്ധതിയുൾപ്പെടുത്തി നവീകരിച്ച സ്റ്റേഷനിൽ ഏറ്റവും മികച്ച സൗകര്യങ്ങളാണ് നിലവിൽ ഒരുക്കിയിരിക്കുന്നത്. കൂടുതൽ യാത്രക്കാരെ സ്റ്റേഷനിലെത്തിക്കാൻ നിലവിലെ വികസനങ്ങൾക്ക്‌ കഴിഞ്ഞെന്ന് യാത്രക്കാരുടെ കൂട്ടായ്മയായ ഫ്രണ്ട്‌സ് ഓൺ റെയിൽസ് വ്യക്തമാക്കി.
എം ജി യൂണിവേഴ്‌സിറ്റി, ബ്രില്യന്റ് കോളേജ്, ഐടിഐ, മെഡിക്കൽ കോളേജ്, ഐസിഎച്ച് എന്നിവിടങ്ങളിലേയ്ക്കുള്ള നൂറുകണക്കിന് യാത്രക്കാരാണ് ദിവസവും ഏറ്റുമാനൂർ സ്റ്റേഷനിൽ ഇറങ്ങുന്നത്. ഏറ്റുമാനൂർ ക്ഷേത്രത്തിലേയ്ക്ക് സ്റ്റേഷനിൽ നിന്ന് കേവലം ഒന്നര കിലോമീറ്റർ മാത്രം ദൂരമുള്ളതിനാൽ ഇവിടെ ഇറങ്ങുന്നതിൽ നല്ല ശതമാനം ഭക്തജനങ്ങളും സ്റ്റേഷന്റെ വരുമാനത്തിൽ മുഖ്യപങ്ക് വഹിക്കുന്നുണ്ട്. അതുകൊണ്ട് തന്നെ ഏറ്റുമാനൂർ ക്ഷേത്ര ഉപദേശക സമിതി അംഗങ്ങളും സ്റ്റേഷന്റെ വികസനത്തിനായി സജീവമായി രംഗത്തുണ്ട്.
തിരുവനന്തപുരം ഭാഗത്തേയ്ക്ക് രാവിലെ ട്രെയിനുകൾ ഒന്നും ഇല്ലാത്തതുമൂലമുള്ള ദുരിതം ഉപദേശക സമിതി പ്രസിഡന്റ് പികെ രാജൻ, സെക്രട്ടറി മഹേഷ്‌ രാഘവൻ എന്നിവരുടെ നേതൃത്വത്തിലുള്ള സംഘം കേന്ദ്രമന്ത്രി സുരേഷ് ഗോപിയെ ബോധിപ്പിച്ചിരുന്നു. സ്റ്റോപ്പിന്റെ സാധ്യതകൾ പരിശോധിക്കുന്നതായാണ് അദ്ദേഹത്തിന്റെ തൃശൂരിലെ ഓഫീസിൽ നിന്നും അവസാനം ലഭിച്ചിരിക്കുന്ന മറുപടി.
എറണാകുളത്തേയ്ക്കുള്ള ഓഫീസ് ജീവനക്കാരുടെ എണ്ണത്തിലും വലിയ വർദ്ധനവ് ഉണ്ടായിട്ടുണ്ട്. കോട്ടയം റെയിൽവേ സ്റ്റേഷനിലേയ്ക്ക് എത്തിച്ചേരാനുള്ള ഗതാഗതക്കുരുക്കും പാർക്കിംഗ് ഫീസിൽ സമീപ കാലത്ത് ഉണ്ടായ വലിയ വർദ്ധനവും ആർപ്പുക്കര, മണർകാട്, ഭാഗത്തുനിന്നുള്ള യാത്രക്കാരെയും ഏറ്റുമാനൂരിലേക്ക് ആകർഷിച്ചു. കോട്ടയം റെയിൽവേ സ്റ്റേഷനിൽ ഇരുചക്ര വാഹനങ്ങൾക്ക് ഒരു മാസത്തെ സീസൺ ടിക്കറ്റിന് ഈടാക്കുന്നത് 600 രൂപയാണ്. ഏറ്റുമാനൂരിൽ 400 രൂപയുമാണ്. വിശാലമായ ഏരിയ പാർക്കിംഗിന് വേണ്ടി ഇവിടെ ഒരുക്കിയിട്ടുണ്ട്. കൂടാതെ ഏറ്റുമാനൂരിൽ റെയിൽവേ ഭൂമി ഇനിയും പ്രയോജനപ്പെടുത്താതെ കിടപ്പുണ്ട്. പഴയ സ്റ്റേഷൻ കെട്ടിടം റെയിൽവേയുടെ എഞ്ചിനീയറിങ് വിഭാഗത്തിന് കൈമാറിയിട്ടുണ്ട്.
അതിരമ്പുഴ സെന്റ് മേരിസ് ഫോറാന പള്ളി കമ്മിറ്റിയുടെയും വർഷങ്ങളായുള്ള ആവശ്യമാണ് വഞ്ചിനാട്. രാവിലെ തിരുവനന്തപുരം ഭാഗത്തേയ്ക്ക് വിവിധ ആവശ്യങ്ങൾക്കായി പോകേണ്ടി വരുന്നവർ കോട്ടയം റെയിൽവേ സ്റ്റേഷനെയാണ് ഇപ്പോൾ ആശ്രയിക്കുന്നത്. പാലാ ഭാഗത്ത് നിന്നുള്ളവർക്ക് വലിയ ദുരിതമാണ് ഇതുമൂലം അനുഭവിക്കേണ്ടി വരുന്നത്. ഏറ്റുമാനൂർ ജനകീയ സമിതിയും വഞ്ചിനാട് സ്റ്റോപ്പുമായി ബന്ധപ്പെട്ട് നിരവധി പ്രതിഷേധ പരിപാടികൾ സ്റ്റേഷനിൽ സംഘടിപ്പിച്ചിരുന്നു.
അമൃത് ഭാരത്‌ പദ്ധതിയുടെ നവീകരണ പ്രവർത്തനങ്ങൾ ഇപ്പോൾ അവസാന ഘട്ടത്തിലാണ്. തിരുവനന്തപുരം ഭാഗത്തേയ്ക്ക് പുലർച്ചെ ഒരു ട്രെയിൻ എന്ന സ്വപ്നം ഈ വർഷമെങ്കിലും സാക്ഷാത്കരിക്കുമെന്ന പ്രതീക്ഷയിൽ ഒരു നാട് മുഴുവൻ കാത്തിരിക്കുകയാണ്.
