ഡല്‍ഹി: വോട്ടർപട്ടികയിലെ ക്രമക്കേടുകള്‍ ആരോപിച്ച്‌ കോണ്‍ഗ്രസ് നേതൃത്വത്തിലുള്ള ഇന്ത്യാ സഖ്യം നവംബർ ഒന്നിന് ഡല്‍ഹിയിലെ രാംലീല മൈതാനിയില്‍ സംഘടിപ്പിക്കുന്ന മഹാറാലിക്ക് നിബന്ധനകളോടെ അനുമതി നല്‍കി ഡല്‍ഹി പൊലീസ്.
നവംബർ മൂന്ന് വരെ രാംലീല മൈതാനം പരിപാടിക്കായി ഉപയോഗിക്കുന്നതിനാണ് കർശന നിബന്ധനകളോടെ പൊലീസ് എൻ.ഒ.സി നല്‍കിയിരിക്കുന്നത്. ജനക്കൂട്ടത്തെ നിയന്ത്രിക്കല്‍, സി.സി.ടി.വി നിരീക്ഷണം, വാഹനങ്ങളുടെ പാർക്കിംഗ്, റാലി അവസാനിപ്പിക്കേണ്ട സമയം എന്നിവയടക്കം നിബന്ധനകളില്‍ ഉള്‍പ്പെട്ടിട്ടുണ്ട്.
'വോട്ട് ചോരി' ആരോപണം ഉയർത്തിയാണ് റാലി നടത്തുന്നത്. എസ്.ഐ.ആറിലുണ്ടായ ക്രമക്കേടുകള്‍ക്ക് മറുപടി പറയണമെന്നും മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാർ രാജിവയ്ക്കണമെന്നും പ്രതിപക്ഷം ആവശ്യപ്പെടും.
രാജ്യത്തിന്റെ വിവിധ ഭാഗങ്ങളില്‍ നിന്നായി പാർട്ടി പ്രവർത്തകരെയും അനുഭാവികളുമായ പത്തുലക്ഷം പേരെ പങ്കെടുപ്പിക്കാനാണ് കോണ്‍ഗ്രസ് ലക്ഷ്യമിടുന്നത്. മൈതാനത്തിന്റെ ഉടമസ്ഥാവകാശമുള്ള അധികൃതരുടെ അനുമതിയും ഇതിന് ആവശ്യമാണ്.
നവംബർ ഒന്നിന് രാവിലെ പത്ത് മുതല്‍ വൈകിട്ട് അഞ്ചുവരെയാണ് റാലി നടത്താൻ നിശ്ചയിച്ചിരിക്കുന്നത്.
സമരത്തില്‍ പങ്കെടുക്കുന്നവർക്ക് ആവശ്യമായ കുടിവെള്ളം ഉറപ്പാക്കാൻ മതിയായ വാട്ടർ ടാങ്കറുകളും സ്ത്രീകള്‍ക്കായി പ്രത്യേക സൗകര്യങ്ങളുള്‍പ്പെടെ ആവശ്യത്തിന് ശുചിമുറികളും സജ്ജീകരിക്കണം.ആള്‍ക്കൂട്ടത്തെ നിയന്ത്രിക്കാൻ വോളന്റിയർമാരെ നിയോഗിക്കണമെന്നും ഇവരെ തിരിച്ചറിയാൻ ഒരേ തരത്തിലുള്ള വസ്ത്രങ്ങളോ തിരിച്ചറിയല്‍ ബാഡ്ജുകളോ ഏർപ്പെടുത്തണമെന്നും നിർദേശമുണ്ട്.
റാലി നവംബർ ഒന്നിന് വൈകിട്ട് അഞ്ചിന് നിർബന്ധമായും അവസാനിപ്പിക്കണം. തുടർന്ന് ജനങ്ങളെ മൈതാനത്തുനിന്ന് ഒഴിപ്പിക്കുന്നതിനുള്ള നടപടികള്‍ ആരംഭിക്കും.
നിശ്ചയിച്ച സമയത്തിനപ്പുറം പരിപാടി നീട്ടാൻ അനുവദിക്കില്ലെന്നും പൊലീസ് വ്യക്തമാക്കി. റാലിക്ക് മുമ്പോ ശേഷമോ പങ്കെടുക്കുന്നവർ രാംലീല മൈതാനത്ത് രാത്രി തങ്ങാൻ പാടില്ല.
ബസുകള്‍, കാറുകള്‍, ടെമ്പോകള്‍ ഉള്‍പ്പെടെയുള്ള വാഹനങ്ങള്‍ ട്രാഫിക് പൊലീസ് നിർദേശിക്കുന്ന സ്ഥലങ്ങളില്‍ മാത്രമേ പാർക്ക് ചെയ്യാവൂ. റാലി സമാധാനപരമായി നടത്തുകയും പങ്കെടുക്കുന്നവർ അക്രമാസക്തമോ അച്ചടക്കരഹിതമോ ആയ പെരുമാറ്റങ്ങളില്‍ ഏർപ്പെടാതിരിക്കുകയും വേണം. രാംലീല മൈതാനത്തേക്കല്ലാതെ മറ്റൊരു ലക്ഷ്യസ്ഥാനത്തേക്കും പ്രകടനമോ മാർച്ചോ നടത്താൻ പാടില്ലെന്നും പൊലീസ് നിർദേശിച്ചിട്ടുണ്ട്.
