കോട്ടയം: റെയില്‍വേ സ്റ്റേഷനിലെ പ്രധാന കവാടത്തില്‍നിന്നു പുതുതായി നിർമിച്ച കാല്‍നട മേല്‍പ്പാലത്തിലൂടെ രണ്ട്, മൂന്ന് പ്ലാറ്റ്ഫോമിലേക്ക് എത്തുന്ന യാത്രക്കാർ മഴ നനയുന്നത് ഒഴിവാക്കുന്നതിനായുള്ള മേല്‍ക്കൂരയുടെ നിർമാണം ആരംഭിച്ചതായി ഫ്രാൻസിസ് ജോർജ് എംപി അറിയിച്ചു.
വിവിധ പ്ലാറ്റ്ഫോമുകളില്‍ മേല്‍ക്കൂര ഇല്ലാഞ്ഞ സ്ഥലങ്ങളില്‍ പൂർണമായും മേല്‍ക്കൂര നിർമിക്കുന്നതിനുള്ള പദ്ധതിക്ക് അംഗീകാരം ലഭിച്ചു. ഉടനെ തന്നെ ടെൻഡർ നടപടികള്‍ പൂർത്തിയാക്കി പ്രവൃത്തി ആരംഭിക്കും.ഇത് സംബന്ധിച്ച്‌ ഫ്രാൻസിസ് ജോർജ് എംപി റെയില്‍വേ ഡിവിഷണല്‍ മാനേജരുമായി നടത്തിയ ചർച്ചയെത്തുടർന്നാണ് ഇക്കാര്യം അറിയിച്ചത്.
ശബരിമല തീർഥാടകള്‍ക്ക് വിശ്രമിക്കാനുള്ള പില്‍ഗ്രിം സെന്ററിന്റെ മുൻവശത്തെ കോണ്‍ക്രീറ്റിംഗ്, പ്രധാന കവാടത്തിന് സമീപത്തെ റോഡുകളുടെ അറ്റകുറ്റപ്പണികള്‍ എന്നിവ ഉടൻ പൂർത്തിയാക്കും.
ടിക്കറ്റ് കൗണ്ടറിലെ അനിയന്ത്രിതമായ തിരക്ക് കുറയ് ക്കുന്നതിനായി കൊമേഷ്യല്‍ വിഭാഗത്തില്‍ രണ്ടു പേരെ പുതുതായി നിയമിക്കുമെന്നും ഫ്രാൻസിസ് ജോർജ് എംപി അറിയിച്ചു.
ശബരിമല തീർഥാടനവുമായി ബന്ധപ്പെട്ട മുന്നൊരുക്കങ്ങള്‍ വിലയിരുത്തുന്നതിനായി 16നു രാവിലെ 10ന് ഫ്രാൻസിസ് ജോർജ് എംപി കോട്ടയം റെയില്‍വേ സ്റ്റേഷൻ സന്ദർശിക്കും.
