ഇന്ദ്രൻസും മധുബാലയും പ്രധാന കഥാപാത്രങ്ങളായി എത്തിയ ഏറ്റവും പുതിയ ചിത്രം ‘ചിന്ന ചിന്ന ആശൈ’യുടെ ഒടിടി റിലീസ് പ്രഖ്യാപിച്ചു. ചിത്രത്തിന്റെ സ്ട്രീമിംഗ് അവകാശം ജിയോ ഹോട്സ്റ്റാറാണ് സ്വന്തമാക്കിയിരിക്കുന്നത്. ജൂലൈ 28 മുതൽ ചിത്രം ഒടിടിയിൽ സ്ട്രീമിംഗ് ആരംഭിക്കും. വർഷ വാസുദേവ് രചനയും സംവിധാനവും നിർവഹിച്ച ചിത്രത്തിന് തിയറ്ററുകളിൽ മികച്ച പ്രതികരണമാണ് ലഭിച്ചത്.
കോഴിക്കോട്ടുകാരനായ വിരമിച്ച യുപി സ്കൂൾ അധ്യാപകൻ മാധവൻ മാഷായാണ് ഇന്ദ്രൻസ് ചിത്രത്തിലെത്തുന്നത്. ബനാറസ് യൂണിവേഴ്സിറ്റിയിൽ കഥക് പഠിക്കുന്ന മകളെ കാണാനായി വാരണാസിയിലേക്ക് പതിവായി യാത്ര ചെയ്യുന്ന മാധവൻ മാഷ്, അത്തരമൊരു യാത്രയ്ക്കിടെ മധുബാല അവതരിപ്പിക്കുന്ന ലീലയെ യാദൃശ്ചികമായി കണ്ടുമുട്ടുന്നു. തുടർന്ന് ഇരുവരുടെയും ജീവിതത്തിലുണ്ടാകുന്ന സംഭവവികാസങ്ങളിലൂടെയാണ് ചിത്രത്തിന്റെ കഥ മുന്നോട്ടുപോകുന്നത്.
ദുൽഖറിന്റെ വേഫെറർ ഫിലിംസാണ് ‘ചിന്ന ചിന്ന ആശൈ’ കേരളത്തിലെ തിയറ്ററുകളിൽ എത്തിച്ചത്. ബാബുജി പ്രൊഡക്ഷൻസിന്റെ ബാനറിൽ അഭിജിത് ബാബുജിയാണ് ചിത്രം നിർമ്മിച്ചത്. ഇന്ദ്രൻസ്, മധുബാല എന്നിവർക്കൊപ്പം അപർണ ബാലമുരളി, വിഷ്ണു അഗസ്ത്യ, തമ്പി രാമയ്യ, കാളി വെങ്കട്, ജാഫർ സാദിഖ്, സായ് ജനനി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഫയിസ് സിദ്ധിക്ക് ഛായാഗ്രഹണം നിർവഹിച്ച ചിത്രത്തിന് ഗോവിന്ദ് വസന്തയാണ് സംഗീതമൊരുക്കിയത്. റെക്സൺ ജോസഫാണ് എഡിറ്റർ. പ്രശാന്ത് നാരായൺ പ്രൊഡക്ഷൻ കൺട്രോളറും സാബു മോഹൻ ആർട്ട് ഡയറക്ടറുമാണ്. സമീറ സനീഷ് വസ്ത്രാലങ്കാരവും രഞ്ജിത്ത് അമ്പാടി മേക്കപ്പും നിർവഹിച്ചു. രംഗനാഥ് രവിയാണ് സൗണ്ട് ഡിസൈനർ. പി.സി. വിഷ്ണു സൗണ്ട് മിക്സിംഗും ബ്രിന്ദ കൊറിയോഗ്രാഫിയും നിർവഹിച്ചു. ശബരിയാണ് ചിത്രത്തിന്റെ പിആർഒ.
