വൈക്കം: കെഎസ്ആർടിസി ബസിൽനിന്നു ചാടി ഇറങ്ങുന്നതിനിടെ റോഡിൽ വീണ വീട്ടമ്മയ്ക്കു ഗുരുതര പരിക്ക്. ഇന്നലെ വൈകുന്നേരം 3.30 ഓടെ വൈക്കം വലിയ കവലയിലാണ് സംഭവം.
എറണാകുളം പറവൂർ സ്വദേശിനി വിജി ബെന്നി (55)യ്ക്കാണ് പരിക്കേറ്റത്. ഇവരെ വിദഗ്ധ ചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
റൂട്ട് മാറി വൈക്കം-തൊടുപുഴ ബസിൽ കയറിയ ഇവർ വലിയ കവലയിൽ എത്തിയപ്പോഴാണ് എറണാകുളം ഭാഗത്തേക്ക് പോകേണ്ടതിന് പകരം ബസ് കോട്ടയം ഭാഗത്തേക്കു തിരിയുന്നത് മനസിലാക്കിയത്.
ഉടൻ ബസ് നിർത്തണമെന്ന് കണ്ടക്ടറോടു പറയുകയും വളവ് തിരിഞ്ഞു സമീപത്തെ സ്റ്റോപ്പിൽ നിർത്തി ഇവരെ ഇറക്കാമെന്ന് പറയുന്നതിനിടെ ഇവർ ഡോർ തുറന്ന് പുറത്തേക്കു ചാടുകയായിരുന്നുവെന്ന് പറയുന്നു.
