തിരുവനന്തപുരം: ബി.എല്‍.എം (BLM) ഹൗസിങ് കോ-ഓപ്പറേറ്റീവ് സൊസൈറ്റിയുടെ മറവില്‍ സാധാരണക്കാരായ ആയിരക്കണക്കിന് നിക്ഷേപകരെ പറ്റിച്ച്‌ മുന്നൂറ് കോടിയോളം രൂപ തട്ടിയെടുത്ത കേസില്‍ സ്ഥാപക ചെയര്‍മാന്‍ ആര്‍. പ്രേംകുമാറിനെ ക്രൈംബ്രാഞ്ച് നാടകീയമായി കസ്റ്റഡിയിലെടുത്തു.
ചെന്നൈയിലെ ആഡംബര വസതിയില്‍ ഒളിവില്‍ കഴിയുകയായിരുന്ന ഇയാളെ ക്രൈംബ്രാഞ്ച് സംഘം അവിടെയെത്തി പിടികൂടുകയായിരുന്നു.
നിക്ഷേപകരില്‍ നിന്ന് വാങ്ങി സൊസൈറ്റിയുടെ അക്കൗണ്ടുകളിലെത്തിയ തുക നിയമവിരുദ്ധമായി സ്വന്തം പേരിലേക്കും ഭാര്യയുടെ പേരിലേക്കും മാറ്റി സ്ഥാപിച്ച വ്യാജ (ഷെല്‍) കമ്പനികളിലേക്ക് വകമാറ്റിയെന്നാണ് ക്രൈംബ്രാഞ്ച് കണ്ടെത്തല്‍. കസ്റ്റഡിയിലുള്ള പ്രേംകുമാറിനെ ഉടന്‍ തന്നെ കേരളത്തിലേക്ക് എത്തിച്ച്‌ അറസ്റ്റ് രേഖപ്പെടുത്തുന്നതടക്കമുള്ള തുടര്‍ നിയമനടപടികള്‍ അന്വേഷണ സംഘം വേഗത്തിലാക്കും.
സഹകരണ സംഘങ്ങളിലേക്ക് എത്തുന്ന തുക മറ്റ് മേഖലകളിലേക്ക് വഴിതിരിച്ചുവിടരുതെന്ന കര്‍ശന നിയമം ലംഘിച്ച്‌ 17 ഷെല്‍ കമ്പനികളാണ് ഇയാള്‍ തട്ടിപ്പിനായി മാത്രം നിര്‍മ്മിച്ചെടുത്തത്. പൊതുജനങ്ങളുടെ പണം ഉപയോഗിച്ച്‌ തിരുവനന്തപുരത്ത് 17 കോടി രൂപ വിലമതിക്കുന്ന ലക്ഷ്വറി സ്വീറ്റ് ഹോട്ടല്‍ പ്രേംകുമാറിന്റെ ഭാര്യയുടെ പേരിലേക്ക് വാങ്ങി മാറ്റുകയായിരുന്നു.
ഇതിനുപുറമെ, പ്രേംകുമാര്‍ ഡയറക്ടറായി പ്രവര്‍ത്തിക്കുന്ന കമ്പനിയുടെ പേരില്‍ മൂന്നാറില്‍ 29 കോടി രൂപ മുടക്കി രണ്ട് റിസോര്‍ട്ടുകളും തൃശൂരിലെ പ്രശസ്തമായ രാഗം തിയേറ്ററും സൊസൈറ്റിയുടെ പണം വഴിതിരിച്ചുവിട്ട് സ്വന്തമാക്കി. തന്റെ നേതൃത്വത്തിലുള്ള എജ്യുക്കേഷന്‍ സൊസൈറ്റിയിലേക്ക് 31 കോടി രൂപ കടത്തുകയും തമിഴ്നാട്ടിലെ കാഞ്ചീപുരത്ത് ഭാര്യയുടെ പേരില്‍ വസ്തുവകകള്‍ വാങ്ങാന്‍ സൊസൈറ്റിയിലെ തുക ഉപയോഗിക്കുകയും ചെയ്തു.
പ്രാഥമിക അന്വേഷണത്തില്‍ തന്നെ 300 കോടി രൂപയുടെ നേരിട്ടുള്ള സാമ്പത്തിക തട്ടിപ്പ് വ്യക്തമായി തെളിഞ്ഞിട്ടുണ്ട്. എന്നാല്‍ ഇതിനുപുറമെ വിവിധ ബാങ്ക് അക്കൗണ്ടുകള്‍ വഴി ആയിരത്തി ഇരുനൂറ് കോടി രൂപയുടെ ദുരൂഹവും സംശയാസ്പദവുമായ സാമ്പത്തിക ഇടപാടുകള്‍ നടന്നിട്ടുണ്ടെന്നാണ് അന്വേഷണ ഉദ്യോഗസ്ഥരുടെ നിഗമനം.
ബി.എല്‍.എം സ്ഥാപനത്തില്‍ 80 കോടി രൂപയുടെ കടുത്ത സാമ്പത്തിക ക്രമക്കേട് നടന്നതായി കമ്പനിയുടെ സി.ഇ.ഒ തന്നെ നല്‍കിയ പരാതിയുടെ അടിസ്ഥാനത്തിലാണ് വിഷയം പുറത്തറിഞ്ഞത്. കോഴിക്കോട് നടക്കാവ് പോലീസ് എടുത്ത ഈ കേസിന്റെ വ്യാപ്തി കണക്കിലെടുത്ത് പിന്നീട് അന്വേഷണം പൂര്‍ണ്ണമായും ക്രൈംബ്രാഞ്ചിന് കൈമാറുകയായിരുന്നു.
കോടികളുടെ അഴിമതി നടന്ന് മാസങ്ങള്‍ പിന്നിട്ടിട്ടും കേസില്‍ രേഖപ്പെടുത്തുന്ന ഏറ്റവും പ്രധാനപ്പെട്ട ആദ്യ അറസ്റ്റാണിത്. സ്ഥാപക ചെയര്‍മാന്‍ തന്നെ നേരിട്ട് കസ്റ്റഡിയിലായതോടെ മറ്റ് ഭരണസമിതി അംഗങ്ങളും ഇടനിലക്കാരും ഭീതിയിലാണ്.
ചെന്നൈയില്‍ നിന്ന് കസ്റ്റഡിയിലെടുത്ത പ്രേംകുമാറിനെ ചോദ്യം ചെയ്യുന്നതോടെ കൂടുതല്‍ സാമ്പത്തിക തിരിമറികളുടെ ഞെട്ടിപ്പിക്കുന്ന വിവരങ്ങള്‍ പുറത്തുവരുമെന്നാണ് അന്വേഷണ സംഘം പ്രതീക്ഷിക്കുന്നത്. അതോടൊപ്പം തട്ടിപ്പിന് ഒത്താശ ചെയ്ത ഉന്നത ഉദ്യോഗസ്ഥരെയും സഹകരണ വകുപ്പിലെ വമ്പന്മാരെയും കുറിച്ചുള്ള സൂചനകളും ലഭിക്കും.
