കൊച്ചി: വയലിനിസ്റ്റ് ബാലഭാസ്കറിന്‍റെ അപകട മരണത്തിലെ സിബിഐ തുടരന്വേഷണത്തില്‍ ഗുരുതര വീഴ്ചയെന്ന് ഹൈക്കോടതി.
കുറഞ്ഞത് അഡിഷണല്‍ എസ് പി റാങ്കിലുള്ള ഉദ്യോഗസ്ഥൻ കേസ് അന്വേഷിക്കണമെന്നും രണ്ടാഴ്ചക്കകം പുതിയ ഉദ്യോഗസ്ഥനെ നിയമിക്കണമെന്നുമാണ് കോടതി ഉത്തരവ്.
രണ്ടാമതും തുടരന്വേഷണം വേണ്ടെന്ന വിചാരണക്കോടതി ഉത്തരവ് റദ്ദാക്കി. കേസ് ലാഘവത്തോടെ കൈകാര്യം ചെയ്തതിലും ബ്രെയിൻ മാപ്പിങ്, നുണ പരിശോധന എന്നിവ നടത്താത്തതിലും സിബിഐയേയും കോടതി രൂക്ഷമായി വിമർശിച്ചു.
ഹൈക്കോടതി ചൂണ്ടിക്കാട്ടിയ 20 സംശയാസ്പദമായ സാഹചര്യങ്ങള്‍ പരിശോധിച്ചില്ലെന്ന് വിമര്‍ശനം. കേസ് ലാഘവത്തോടെ കൈകാര്യം ചെയ്തുവെന്നും ഹൈക്കോടതി വിമർശിച്ചു.
അന്വേഷണത്തിന് താഴ്ന്ന റാങ്കിലുള്ള ഉദ്യോഗസ്ഥനെ നിയമിച്ചുവെന്നും സംശയമുള്ള സാക്ഷികളുടെ മൊഴികള്‍ അതേപടി സ്വീകരിച്ചെന്നും കോടതി കുറ്റപ്പെടുത്തി.
ബ്രെയിൻ മാപ്പിങ്, നുണ പരിശോധന എന്നിവ നടത്തിയില്ലെന്നും കോടതി ചൂണ്ടിക്കാട്ടുന്നു. ബാലഭാസ്ക്കറിന്റെ മാതാപിതാക്കള്‍ നല്‍കിയ ഹർജിയിലാണ് ഹൈക്കോടതിയുടെ രൂക്ഷ വിമര്‍ശനം.
