പാമ്പാടി: പ്രളയക്കെടുതി നേരിട്ട തിരുവഞ്ചൂര് നീലാണ്ടൻപടി അംഗന്വാടിയിലും സമീപ പ്രദേശങ്ങളിലും പുനരധിവാസ ശുചീകരണ പ്രവര്ത്തനങ്ങളുമായി പാമ്പാടി കെ.ജി.
കോളജിലെ എന്.സി.സി. കേഡറ്റുകളും എന്.എസ്.എസ്. വളണ്ടിയര്മാരും. മണര്കാട് പഞ്ചായത്തിന്റെ പരിധിയില്പ്പെടുന്ന പ്രളയബാധിത മേഖലകളിലാണു വിദ്യാര്ഥികള് സന്നദ്ധസേവനവുമായി രംഗത്തിറങ്ങിയത്.
പ്രളയജലം കയറി ചെളിയും മാലിന്യങ്ങളും അടിഞ്ഞുകൂടിയ അങ്കണവാടിയുടെ ഉള്വശവും പരിസര പ്രദേശങ്ങളും വിദ്യാര്ഥികള് കഴുകി ശുചീകരിച്ചു. കുരുന്നുകള്ക്കു സുരക്ഷിതമായി വീണ്ടും അംഗന്വാടിയിലെത്താന് സജ്ജമാക്കുന്ന രീതിയിലാണു ശുചീകരണ പ്രവര്ത്തനങ്ങള് പൂര്ത്തിയാക്കിയത്. കൂടാതെ, വെള്ളപ്പൊക്കത്തെ തുടര്ന്ന് സുരക്ഷിത സ്ഥാനങ്ങളിലേക്കു മാറ്റിപ്പാര്പ്പിച്ചിരുന്ന സമീപവാസികളുടെ വീട്ടുപകരണങ്ങളും മറ്റ് സാമഗ്രികളും തിരികെ വീടുകളിലേക്ക് എത്തിക്കാനും ഇറക്കിവയ്ക്കാനും വിദ്യാര്ഥികള് പൂര്ണ പിന്തുണ നല്കി.കെ.ജി. കോളജ് പ്രിന്സിപ്പല് പ്രഫ. അബു ജോസഫ് സി, എന്.സി.സി. ഓഫീസര് ലഫ്. റെനിഷ് ജോസഫ്, എന്.എസ്.എസ്. പ്രോഗ്രാം ഓഫീസര്മാരായ നമിത ജോര്ജ്, ആന് നൈസി ജേക്കബ് എന്നിവരുടെ നേതൃത്വത്തിലാണു വിദ്യാര്ഥികള് ശുചീകരണ പ്രവര്ത്തനങ്ങളില് പങ്കാളികളായത്.
