പത്തനംതിട്ട: പുളിക്കീഴ് പൊലീസ് സ്റ്റേഷനില്‍ നിന്ന് പോക്സോ കേസ് പ്രതി പൊലീസ് കസ്റ്റഡിയില്‍ നിന്ന് രക്ഷപ്പെട്ടു.
ഇന്നലെ രാത്രിയോടെയാണ് സംഭവം. പാറാവ് ഡ്യൂട്ടിയിലുണ്ടായിരുന്ന പോലീസുകാരൻ പിന്നാലെ ഓടിയെങ്കിലും പ്രതിയെ പിടികൂടാനായില്ല.
സ്റ്റേഷനില്‍ തടവുകാരെ പാർപ്പിക്കാൻ സുരക്ഷിതമായ സെല്‍ ഇല്ലാത്തതാണ് പ്രതിക്ക് രക്ഷപ്പെടാൻ വഴിയൊരുക്കിയത്.
തിരുവല്ല ഷുഗർ ഫാക്ടറിയുടെ പഴയ കെട്ടിടത്തിലാണ് കാലങ്ങളായി പുളിക്കീഴ് പോലീസ് സ്റ്റേഷൻ പ്രവർത്തിച്ചു വരുന്നത്. ലോക്കപ്പ് സൗകര്യമില്ലാത്തതിനാല്‍ തറയില്‍ ഉറപ്പിച്ചിരിക്കുന്ന കൊളുത്തില്‍ കൈവിലങ് ബന്ധിച്ചാണ് സാധാരണയായി ഇവിടെ പ്രതികളെ നിർത്തിയിരുന്നത്.
ഈ കൊളുത്ത് ബലമായി ഇളക്കി മാറ്റിയാണ് പ്രതി രക്ഷപ്പെട്ടത്. സംഭവത്തെ തുടർന്ന് പ്രദേശത്ത് പോലീസ് തിരച്ചില്‍ ഊർജിതമാക്കിയിട്ടുണ്ട്.
അതേസമയം, അടിസ്ഥാന സൗകര്യങ്ങളില്ലാത്ത കെട്ടിടത്തില്‍ സ്റ്റേഷൻ പ്രവർത്തിക്കുന്നതിലെ സുരക്ഷാ ഭീഷണിയും ഇതോടെ വീണ്ടും ചർച്ചയായിരിക്കുകയാണ്.
