കായംകുളം: പട്ടാപ്പകൽ യുവാവിനെ തട്ടിക്കൊണ്ടുപോയി ഇരുമ്പ് പൈപ്പും ഹെൽമെറ്റും ഉപയോഗിച്ച് ക്രൂരമായി മർദ്ദിച്ച കേസിൽ മൂന്ന് പ്രതികൾ പിടിയിൽ. വാഹന കച്ചവടക്കാരനായ കായംകുളം സ്വദേശി മുഹമ്മദ് അഫ്സലിനെയാണ് സംഘം ആക്രമിച്ച് അവശനാക്കിയത്. നിരവധി ക്രിമിനൽ കേസുകളിൽ പ്രതികളായ പത്തിയൂർ എരുവ പടിഞ്ഞാറ് മുറിയിൽ മനീഷ് (37), കണ്ടല്ലൂർ വളയക്കകത്ത് കിഴക്കതിൽ പ്രവീൺ (29), പെരിങ്ങാല മുറിയിൽ മേട്ടയിൽ തെക്കതിൽ വീട്ടിൽ താമസിക്കുന്ന മുഹമ്മദ് മുനീർ (25) എന്നിവരാണ് കായംകുളം പൊലീസിന്റെ പിടിയിലായത്. കേസിലെ നാലാം പ്രതി അഷ്റഫ് ഒളിവിലാണ്.
വാഹന കച്ചവടവുമായി ബന്ധപ്പെട്ട് അഫ്സലും ഒന്നാം പ്രതി മനീഷും തമ്മിലുണ്ടായിരുന്ന സാമ്പത്തിക ഇടപാടാണ് തട്ടിക്കൊണ്ടുപോകലിന് കാരണം. കഴിഞ്ഞ ഒക്ടോബർ 18-ന് ഉച്ചയ്ക്ക് രണ്ട് മണിയോടെ കായംകുളം വനിതാ പോളിടെക്നിക്കിന് പിറകുവശത്ത് സുഹൃത്തുക്കൾക്കൊപ്പം നിൽക്കുകയായിരുന്ന അഫ്സലിനെ ഓട്ടോറിക്ഷയിലെത്തിയ പ്രതികൾ ആക്രമിച്ച് ബലമായി കൊണ്ടുപോവുകയായിരുന്നു. കൂടെയുണ്ടായിരുന്ന സുഹൃത്തുക്കളെ ബിയർ കുപ്പി വീശി ഭയപ്പെടുത്തിയ ശേഷമാണ് അഫ്സലിനെ ഓട്ടോയിൽ കയറ്റിക്കൊണ്ടുപോയത്.
തുടർന്ന് മനീഷിന്റെ കരീലക്കുളങ്ങരയിലുള്ള വീട്ടിലെത്തിച്ച് മുറിയിൽ പൂട്ടിയിടുകയും, മനീഷ്, കുട്ടൻ, മുനീർ, അഷ്റഫ് എന്നിവർ ചേർന്ന് ഇരുമ്പ് പൈപ്പ്, വാക്കിംഗ് സ്റ്റിക്ക്, ഹെൽമെറ്റ് എന്നിവ ഉപയോഗിച്ച് ക്രൂരമായി മർദ്ദിക്കുകയായിരുന്നു. പ്രതികൾ കഴുത്തിൽ കത്തിവെച്ച് കൊന്നുകളയുമെന്നും ഭീഷണിപ്പെടുത്തി. വിവരമറിഞ്ഞ് സ്ഥലത്തെത്തിയ കായംകുളം പൊലീസ് സംഘമാണ് അഫ്സലിനെ രക്ഷപ്പെടുത്തി ആശുപത്രിയിൽ എത്തിച്ചത്.
പിടിയിലായ ഒന്നാം പ്രതി മനീഷ് കായംകുളം, കരീലക്കുളങ്ങര, ഹരിപ്പാട്, ഡൽഹി, അമ്പലപ്പുഴ തുടങ്ങിയ സ്റ്റേഷനുകളിലായി 17-ഓളം കേസുകളിൽ പ്രതിയും കാപ്പാ (KAAPA) നിയമപ്രകാരം നടപടി നേരിട്ട ആളുമാണ്. രണ്ടാം പ്രതി പ്രവീൺ കായംകുളം, കനകക്കുന്ന്, കരീലക്കുളങ്ങര സ്റ്റേഷനുകളിലായി ആറോളം കേസുകളിലും, മൂന്നാം പ്രതി മുനീർ കായംകുളം, കരീലക്കുളങ്ങര, ശാന്തൻപാറ സ്റ്റേഷനുകളിലെ ആറോളം കേസുകളിലും പ്രതികളാണ്.
കായംകുളം ഡി.വൈ.എസ്.പി. രാജപ്പൻ റാവുത്തറുടെ നേതൃത്വത്തിൽ സി.ഐ. രജീഷ് കുമാർ, എസ്.ഐ.മാരായ സജിത് മോൻ, അഫ്സൽ, പ്രേംജിത്ത്, മുഹമ്മദ് ബഷീർ, മറ്റ് പൊലീസുദ്യോഗസ്ഥരായ അഖിൽ മുരളി, റെജിൻ, പ്രവീൺ, അനന്തകൃഷ്ണൻ, സജീഷ്, സഞ്ജു, സൗമ്യ എന്നിവരടങ്ങിയ സംഘമാണ് പ്രതികളെ പിടികൂടിയത്.
