ബെംഗളൂരു: ബെംഗളൂരുവിൽ അഭിഭാഷകൻ വെടിയേറ്റ് മരിച്ചു . പട്ടന്തൂർ അഗ്രഹാര സ്വദേശി 42കാരനായ മഞ്ജുനാഥ് ആണ് കൊല്ലപ്പെട്ടത്. മഞ്ജുനാഥിൻ്റെ വീട്ടിൽ വാടകയ്ക്ക് താമസിച്ചിരുന്ന രണ്ടുപേരാണ് അദ്ദേഹത്തിന് നേരെ വെടിയുതിർത്തത്. വെടിവെപ്പിൽ പിന്നാലെ ബിഹാർ സ്വദേശികളായ പ്രതികൾ കടന്നുകളഞ്ഞു. ഇതുവരെ ഇവരെ പിടികൂടാനായിട്ടില്ല.
ഇന്നലെ രാത്രി 11:30ന് വൈറ്റ്ഫീൽഡ് പൊലീസ് സ്റ്റേഷന് സമീപമാണ് സംഭവം നടന്നത് . വാടക നൽകാത്തതിനെച്ചൊല്ലി മഞ്ജുനാഥും വാടകക്കാരും തമ്മിലുണ്ടായ തർക്കത്തിന് പിന്നാലെയാണ് വെടിവെപ്പ് ഉണ്ടായതെന്ന് പൊലീസ് പറഞ്ഞു . നെറ്റിയിൽ വെടിയേറ്റ മഞ്ജുനാഥിന് ജീവൻ നഷ്ടപ്പെടുകയായിരുന്നു.
സംഭവത്തിൽ വൈറ്റ്ഫീൽഡ് പൊലീസ് കേസെടുത്ത് ഒളിവിൽ പോയ പ്രതികൾക്കായി അന്വേഷണം ആരംഭിച്ചിട്ടുണ്ട്. ഫോറൻസിക് സംഘം സംഭവസ്ഥലത്ത് പരിശോധന നടത്തി. മഞ്ജുനാഥിൻ്റെ മൃതദേഹം പോസ്റ്റുമോർട്ടത്തിനായി മാറ്റിയിട്ടുണ്ട് . പ്രതികൾ രണ്ടുപേരും ഓൺലൈൻ ഭക്ഷണ വിതരണക്കരായി ജോലി ചെയ്യുകയായിരുന്നുവെന്നും പോലീസ് അറിയിച്ചു .
