കോട്ടയം: ജനങ്ങളെ കബളിപ്പിച്ച് സൈബർ തട്ടിപ്പുകാർ പുതിയ രീതികള് പരീക്ഷിക്കുന്നു. മോട്ടർ വാഹന വകുപ്പിന്റെ പേരില് വ്യാജ ഇ-ചെല്ലാൻ സന്ദേശങ്ങള് അയച്ചുള്ള തട്ടിപ്പുകള്ക്ക് പിന്നാലെ, ഇപ്പോള് പെൻഷന്റെ പേരില് ഫേസ്ബുക്ക് വഴിയുള്ള സൈബർ തട്ടിപ്പുകളും വ്യാപകമാകുന്നു.
ഫേസ്ബുക്കില് പെൻഷനുമായി ബന്ധപ്പെട്ട ലിങ്കില് ക്ലിക്ക് ചെയ്തവർക്കാണ് പണം നഷ്ടമാകുന്നത്.
നിരവധി കേസുകളാണ് കഴിഞ്ഞ ദിവസങ്ങളില് റിപ്പോർട്ട് ചെയ്യപ്പെട്ടിട്ടുള്ളത്. ഫേസ്ബുക്കില് പരസ്യങ്ങളായോ ലിങ്കുകളായോ എത്തുന്ന ഇത്തരം സന്ദേശങ്ങള് സാധാരണക്കാരെയാണ് പ്രധാനമായും ലക്ഷ്യമിടുന്നത്.
കണ്ണൂരില് തട്ടിപ്പിനിരയായ 66 വയസ്സുകാരന്റെ അനുഭവം സൈബർ പോലീസ് വ്യക്തമാക്കുന്നത് ഇങ്ങനെയാണ്:
ഫേസ്ബുക്കില് പരതുന്നതിനിടയിലാണ് പെൻഷൻ കാർഡുമായി ബന്ധപ്പെട്ട പരസ്യം ഇദ്ദേഹത്തിന്റെ ശ്രദ്ധയില് പെടുന്നത്.
പരസ്യത്തിനൊപ്പമുണ്ടായിരുന്ന ലിങ്കില് ക്ലിക്ക് ചെയ്ത ഉടൻതന്നെ ഒരു വാട്സാപ്പ് നമ്പറിലേക്ക് സന്ദേശമെത്തി.
തുടർന്ന് വാട്സാപ്പ് വഴി വന്ന നിർദ്ദേശപ്രകാരം വയോധികൻ തന്റെ വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും തട്ടിപ്പുകാർക്ക് കൈമാറുകയായിരുന്നു.
ഇതിനുപിന്നാലെ ഫോണിലേക്ക് ഒരു എപികെ ഫയല് ഡൗണ്ലോഡ് ചെയ്യപ്പെട്ടു.
ഈ ഫയല് ഓപ്പണ് ചെയ്തതോടെ നിയന്ത്രണം തട്ടിപ്പുകാരുടെ കൈയിലാവുകയും, ബാങ്ക് അക്കൗണ്ടില് നിന്ന് പലതവണയായി പണം നഷ്ടപ്പെടുകയും ചെയ്തു.
പതിനായിരം രൂപ വീതം 10 തവണകളിലായി ആകെ ഒരു ലക്ഷം രൂപയാണ് ഇദ്ദേഹത്തിന് നഷ്ടമായത്.
സാമൂഹിക മാധ്യമങ്ങളില് വരുന്ന വ്യാജ ലിങ്കുകളും ഓഫറുകളും തിരിച്ചറിയാൻ പൊതുജനങ്ങള് ജാഗ്രത പാലിക്കണമെന്ന് സൈബർ പോലീസ് മുന്നറിയിപ്പ് നല്കുന്നു.
പരിചയമില്ലാത്ത നമ്പറുകളില് നിന്നുള്ള ലിങ്കുകളില് ക്ലിക്ക് ചെയ്യാതിരിക്കുകയോ, APK ഫയലുകള് ഡൗണ്ലോഡ് ചെയ്യാതിരിക്കുകയോ ചെയ്യുക.
ഇത്തരം തട്ടിപ്പുകള്ക്കെതിരെ നിരന്തരം ബോധവല്ക്കരണ്ണങ്ങള് നല്കുന്നുണ്ടെങ്കിലും ആളുകള് വീണ്ടും കബളിപ്പിക്കപ്പെടുന്ന സാഹചര്യമാണുള്ളത്





