കോട്ടയം: അധികാരപരിധി മറികടന്നു വാഹന്‍ പോര്‍ട്ടലില്‍ ഡിപ്പാര്‍ട്ട്മെന്റ് യൂസര്‍ ക്രെഡന്‍ഷ്യലുകള്‍ സൃഷ്ടിച്ച ചങ്ങനാശേരി സബ് ആര്‍.ടി.ഒയിലെ ക്ലര്‍ക്ക് ജി. ജെയിംസ് ഫെര്‍ണാണ്ടസിനെ സസ്പെന്‍ഡ് ചെയ്തു.
മോട്ടോര്‍ തൊഴിലാളി ക്ഷേമനിധി വിഹിതം അടയ്ക്കാത്ത വാഹനങ്ങളുടെ നികുതി അടയ്ക്കുന്നതിനായാണു ക്രെഡന്‍ഷ്യലുകള്‍ സൃഷ്ടിച്ചത്.
2025 ഏപ്രില്‍ ഒന്നു മുതല്‍ 2026 മാര്‍ച്ച്‌ 31 വരെയുള്ള കാലയളവില്‍ 284 ക്രെഡന്‍ഷ്യലുകള്‍ സൃഷ്ടിച്ചതായാണു കണ്ടെത്തല്‍.
ഇതില്‍ 199 എണ്ണം ചങ്ങനാശേരി സബ് ആര്‍.ടി.ഒ പരിധിയിലെ വാഹനങ്ങള്‍ക്കും ഒരെണ്ണം കൊല്ലം ആര്‍.ടി.ഒ പരിധിയിലെ വാഹനത്തിനും 84 എണ്ണം മറ്റ് വിദൂര അധികാരപരിധികളിലെ വാഹനങ്ങള്‍ക്കുമാണ്.
മോട്ടോര്‍വാഹന വകുപ്പിലെ ക്ഷേമനിധി തട്ടിപ്പില്‍ ഉദ്യോഗസ്ഥരുടെ പങ്കും സാമ്പത്തിക ഇടപാടികളും അന്വേഷിക്കണമെന്നാവശ്യപ്പെട്ടു ഗതാഗത കമ്മീഷണര്‍ നാഗരാജു ചകിലം വിജിലന്‍സിനു നല്‍കിയ കത്തിന് പിന്നാലെയാണ് നടപടി.
