വടകര: വടകര മയ്യന്നൂരില്‍ പോക്സോ കേസ് പ്രതിക്ക് വെട്ടേറ്റു.
മയ്യന്നൂര്‍ സ്വദേശി തട്ടാറത്ത് മീത്തല്‍ നാസറിനാണ് (നാസര്‍) ഗുരുതരമായി പരുക്കേറ്റത്.
കടയില്‍ സാധനം വാങ്ങാനെത്തിയ പത്തു വയസ്സുകാരിയെ പീഡിപ്പിച്ച കേസില്‍ റിമാന്‍ഡിലായിരുന്ന നാസര്‍, അടുത്തിടെയാണ് ജാമ്യത്തില്‍ പുറത്തിറങ്ങിയത്. പെണ്‍കുട്ടിയുടെ ബന്ധുവാണ് ആക്രമണത്തിന് പിന്നിലെന്നാണ് പോലീസിന്റെ പ്രാഥമിക നിഗമനം.
കഴുത്തിലും കൈകളിലും ഉള്‍പ്പെടെ ശരീരത്തിന്റെ വിവിധ ഭാഗങ്ങളില്‍ ആഴത്തില്‍ വെട്ടേറ്റ നാസറിനെ ആദ്യം വടകര ജില്ലാ ആശുപത്രിയില്‍ പ്രവേശിപ്പിച്ചു. പിന്നീട് പരുക്കിന്റെ ഗൗരവം കണക്കിലെടുത്ത് വിദഗ്ധ ചികിത്സയ്ക്കായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റുകയായിരുന്നു.
ഈ മാസം മൂന്നാം തീയതിയാണ് കേസിനാസ്പദമായ സംഭവം നടക്കുന്നത്. വീടിനോട് ചേര്‍ന്ന് കട നടത്തിവരികയായിരുന്ന നാസര്‍, കടയില്‍ സാധനം വാങ്ങാന്‍ എത്തിയ പത്ത വയസ്സുകാരിയായ പെണ്‍കുട്ടിയെ പീഡിപ്പിക്കുകയായിരുന്നു.
ഈ സംഭവത്തിലാണ് ഇയാള്‍ പോക്സോ കേസില്‍ അറസ്റ്റിലായി റിമാന്‍ഡില്‍ കഴിഞ്ഞിരുന്നത്. സംഭവത്തെക്കുറിച്ച്‌ പോലീസ് കൂടുതല്‍ അന്വേഷണം നടത്തിവരികയാണ്.
