കോഴിക്കോട്: കൊയിലാണ്ടിയില്‍ മോഷണപരമ്പര.
പൊയില്‍ക്കാവിലെ വീട്ടില്‍നിന്ന് പന്ത്രണ്ട് പവനും ചേമഞ്ചേരി റെയില്‍വേ സ്റ്റേഷനില്‍നിന്ന് പണവും ഫോണും മോഷണം പോയി.
ഇന്നലെ രാത്രിയാണ് വിവിധ സ്ഥലങ്ങളില്‍ മോഷണവും മോഷണ ശ്രമവും ഉണ്ടായത്. പൊയില്‍ക്കാവില്‍ കരുണാകരനെന്നയാളുടെ വീട്ടില്‍നിന്നാണ് സ്വർണം നഷ്‌ടപ്പെട്ടത്. ഗ്രില്ല് കുത്തിത്തുറന്നാണ് മോഷ്‌ടാവ് അകത്തുകയറിയത്.
സമാനമായ രീതിയില്‍ പൂക്കാട് പനായിലും മോഷണശ്രമം നടന്നു. വീട് കുത്തിത്തുറന്നാണ് മോഷ്‌ടാവ് അകത്തുകയറാൻ ശ്രമിക്കുന്നതിനിടെ വീട്ടുകാർ ഉണർന്നതോടെയാണ് മോഷണശ്രമം പരാജയപ്പെട്ടത്.
ചേമഞ്ചേരി റെയില്‍വേ സ്റ്റേഷനിലെ ജീവനക്കാരൻ, ടിക്കറ്റ് കൗണ്ടറിലെ കതകുപൂട്ടി വീട്ടില്‍ പോയപ്പോഴാണ് മോഷണം നടന്നത്. കൗണ്ടറില്‍ സൂക്ഷിച്ചിരുന്ന പണവും ഔദ്യോഗിക ആവശ്യത്തിന് ഉപയോഗിച്ചിരുന്ന മൊബൈല്‍ ഫോണുമാണ് മോഷ്‌ടാവ് കവർന്നത്. ഇവയെല്ലാം നടത്തിയത് ഒരേ സംഘമാണെന്നാണ് പൊലീസിന്റെ വിലയിരുത്തല്‍.
ഫോറൻസിക് സംഘവും വിരലടയാള വിദഗ്‌ദ്ധരും സ്ഥലത്തെത്തി പരിശോധന നടത്തി. റെയില്‍വേ സ്റ്റേഷൻ പരിസരത്തെ സിസിടിവി ദൃശ്യങ്ങള്‍ ഉള്‍പ്പെടെ പരിശോധിച്ച്‌ മോഷ്‌ടാക്കളെ ഉടൻ പിടികൂടുമെന്നാണ് പൊലീസ് അറിയിക്കുന്നത്.
