ഈരാറ്റുപേട്ട : വിനോദസഞ്ചാര കേന്ദ്രമായ വാഗമണ്ണിലേക്കുള്ള പ്രധാന പ്രവേശനപാത നടക്കൽ കോസ് വേ റോഡിന്റെ നവീകരണ പ്രവർത്തനങ്ങൾക്ക് തുടക്കമായി.
നഗരസഭയിലെ ഏറ്റവും കൂടുതൽ വാഹനഗതാഗതമുള്ള റോഡുകളിൽ ഒന്നുമാണിത്. ശക്തമായ മഴയെ തുടർന്ന് വിവിധ ഭാഗങ്ങളിൽ കുഴികൾ രൂപപ്പെട്ട സാഹചര്യത്തിലാണ് റോഡ് നവീകരണം നടത്തുന്നത്.
പദ്ധതി തയ്യാറാക്കുമ്പോൾ റോഡിന് കാര്യമായ കേടുപാടുകൾ ഇല്ലാതിരുന്നതിനാൽ പ്രത്യേക ഫണ്ട് വകയിരുത്തിയിരുന്നില്ല.
എന്നാൽ ഗതാഗതം ദുസഹമാകുംവിധം റോഡ് തകർന്നതോടെ ഭരണസമിതി നഗരസഭ ഫണ്ടിൽ നിന്ന് അടിയന്തരമായി തുക അനുവദിച്ച് നവീകരണ പ്രവർത്തനങ്ങൾ ആരംഭിക്കുകയായിരുന്നു.
ആദ്യഘട്ട ഫോമിങ് പ്രവർത്തനങ്ങളാണ് ഇപ്പോൾ ആരംഭിച്ചിരിക്കുന്നത്. കൂടുതൽ തകർന്ന ഭാഗങ്ങളിൽ ആധുനിക രീതിയിൽ ഇന്റർലോക്ക് പാകി ദീർഘകാലം നിലനിൽക്കുന്ന രീതിയിലാണ് റോഡ് നവീകരിക്കുന്നത്.
ഇതോടൊപ്പം നഗരസഭാ പരിധിയിലെ വിവിധ റോഡുകളുടെയും നവീകരണ പ്രവർത്തനങ്ങൾ പുരോഗമിച്ചുകൊണ്ടിരിക്കുകയാണെന്ന് നഗരസഭാധ്യക്ഷൻ വി.പി. നാസർ അറിയിച്ചു.
