സംഗീത് പ്രതാപ്, ഷറഫുദ്ദീന് എന്നിവർ കേന്ദ്ര കഥാപാത്രങ്ങളായി എത്തുന്ന ചിത്രമാണ് 'ഇറ്റ്സ് എ മെഡിക്കല് മിറക്കിള്'. നവാഗതനായ ശ്യാമിന് ഗിരീഷ് ഒരുക്കുന്ന ചിത്രത്തിന്റെ ട്രെയ്ലർ പുറത്ത്. സെപ്റ്റംബർ 18ആം തീയതി ചിത്രം തിയേറ്ററുകളിലെത്തും. ഡോക്ടര് പോള്സ് എന്റര്ടൈന്മെന്റ്, ഡ്രീം ബിഗ് ഫിലിംസ് എന്നിവയുടെ ബാനറില് ഡോക്ടര് പോള് വര്ഗീസ്, സുജിത് ജെ നായര് എന്നിവര് ചേര്ന്നാണ് ചിത്രം നിര്മ്മിക്കുന്നത്.
അഖില ഭാര്ഗവന് നായികാ വേഷം ചെയ്യുന്ന ചിത്രത്തിന്റെ കഥ, തിരക്കഥ, സംഭാഷണം എന്നിവ രചിച്ചത് നടി നിലീന് സാന്ദ്രയാണ്. കോമയില് നിന്ന് ഉണര്ന്നെഴുന്നേല്ക്കുന്ന സംഗീത് പ്രതാപ് കഥാപാത്രത്തിന് സൂപ്പര് ഹിയറിങ് ശക്തി കിട്ടുന്നത് ആണ് ചിത്രത്തിന്റെ കഥാതന്തു എന്ന് ടീസര് കാണിച്ചു തന്നിരുന്നു. ആ കൗതുകത്തെ കൂടുതല് ഊട്ടി ഉറപ്പിക്കുന്ന രീതിയിലാണ് ചിത്രത്തിന്റെ ട്രെയ്ലർ ഒരുക്കിയിരിക്കുന്നത്. മാത്രമല്ല, ഈ കഥാപാത്രത്തിന് സൂപ്പര് ഹിയറിങ് അല്ലാതെ, മറ്റെന്തെങ്കിലും കഴിവുകള് കൂടിയുണ്ടോ എന്ന സംശയവും ആകാംഷയും പ്രേക്ഷകരില് ജനിപ്പിക്കുന്ന ചില സംഭാഷണങ്ങളും ട്രെയിലറിനെ ഏറെ രസകരമാക്കുന്നുണ്ട്.
ചിത്രത്തിലെ വളരെ നിര്ണായകമായ, കഥാഗതിയില് ഏറെ സ്വാധീനം ചെലുത്തുന്ന കഥാപാത്രങ്ങളെയാണ് ഷറഫുദ്ദീന്, അഖില ഭാര്ഗവന് എന്നിവര് അവതരിപ്പിക്കുന്നത് എന്നും ട്രെയ്ലര് വ്യക്തമാക്കുന്നുണ്ട്. സംഗീത് പ്രതാപ് - ഷറഫുദ്ദീന് ടീമിന്റെ അതീവ രസകരമായ ഓണ് സ്ക്രീന് കെമിസ്ട്രിയും ചിത്രത്തിന്റെ ഹൈലൈറ്റ് ആയി മാറുമെന്നാണ് ട്രെയ്ലര് നല്കുന്ന സൂചന.
കോട്ടയം നസീര്, ആനന്ദ് മന്മഥന്, കിരണ് പീതാംബരന്, പാര്വ്വതി ആര് കൃഷ്ണ തുടങ്ങി വലിയൊരു താരനിര തന്നെ ചിത്രത്തില് അണിനിരക്കുന്നുണ്ട്. ഏറെ കൗതുകത്തോടെയാണ് പ്രേക്ഷകര് ഈ ചിത്രം കാത്തിരിക്കുന്നത്. ഉയര്ന്ന നിലവാരത്തിലുള്ള സാങ്കേതിക പൂര്ണ്ണതയോടെ ഒരുക്കിയ ചിത്രം, ശബ്ദ മിശ്രണത്തിലും സൗണ്ട് ഡിസൈനിലുമെല്ലാം പുതിയൊരു നാഴികക്കല്ല് സൃഷ്ടിക്കും എന്നാണ് പ്രതീക്ഷിക്കപ്പെടുന്നത്.
