മാന്നാർ: ചെന്നിത്തലയില്‍ പൂട്ടിയിട്ടിരുന്ന വീട് കുത്തിത്തുറന്ന് നാലുലക്ഷത്തോളം രൂപയുടെ സാധനങ്ങള്‍ മോഷ്ടിച്ചു.
ചെന്നിത്തല ഇറമ്പമണ്‍ സുബ്രഹ്മണ്യസ്വാമി ക്ഷേത്രക്കുളത്തിന് സമീപത്തുള്ള സിന്ധുവിന്‍റെ വീട്ടിലാണ് മോഷണം നടന്നത്. ഇവർ ബെംഗളൂരുവില്‍ അധ്യാപികയാണ്.
ആറുമാസങ്ങള്‍ക്ക് മുൻപ് സിന്ധുവിന്‍റെ അമ്മ തിരുവനന്തപുരത്തുള്ള ഡോ. ദമ്പതികളായ കൊച്ചുമക്കളുടെ അടുത്തേക്ക് പോയതോടെ വീട് പൂട്ടിയിട്ടിരിക്കുകയായിരുന്നു.
വല്ലപ്പോഴും വീടും പരിസരവും വൃത്തിയാക്കാനെത്തുന്ന സ്ത്രീയാണ് വർക്ക് ഏരിയയുടെ ഗ്രില്ലും അടുക്കളയുടെ പൂട്ടും കുത്തിപ്പൊളിച്ച നിലയില്‍ ആദ്യം കണ്ടെത്തിയത്.
വിവരമറിഞ്ഞ് നാട്ടിലെത്തിയ സിന്ധു, ബന്ധുക്കളായ മധുസൂദനൻ, മുൻ രാജ്യസഭാ ഉപാധ്യക്ഷന്‍റെ പ്രൈവറ്റ് സെക്രട്ടറി പി വി അശോക് എന്നിവരും മാന്നാർ പോലീസും ചേർന്ന് വീടിനുള്ളില്‍ പരിശോധന നടത്തി.
ഉരുളി, വാർപ്പ്, നിലവിളക്കുകള്‍ എന്നിവയുള്‍പ്പെടെ നാലുലക്ഷത്തോളം രൂപയുടെ സാധനങ്ങള്‍ നഷ്ടപ്പെട്ടതായി സിന്ധു പോലീസിന് നല്‍കിയ മൊഴിയില്‍ പറയുന്നു. മാന്നാർ പൊലീസ് എസ് എച്ച്‌ ഒ കെ അജിത്തിന്റെ നേതൃത്വത്തില്‍ ഊർജിതമായ അന്വേഷണം ആരംഭിച്ചു.
