കൊച്ചി: പെരുമ്പാവൂർ എം.എല്‍.എയുടെ പി.എ ആണെന്ന് വ്യാജേന പരിചയപ്പെടുത്തി ഗൂഗിള്‍ പേ വഴി പണം തട്ടാൻ ശ്രമിച്ച കേസിലെ പ്രധാന പ്രതി പോലീസിന്റെ പിടിയിലായി.
കോട്ടപ്പടി ഇടയാത് വീട്ടില്‍ സുരേഷിനെയാണ് (42) പെരുമ്പാവൂർ പോലീസ് സാഹസികമായി അറസ്റ്റ് ചെയ്തത്.
കാഞ്ഞിരക്കാട് സ്വദേശിയായ സജിത്ത് നല്‍കിയ പരാതിയിലാണ് പോലീസിന്റെ നിർണ്ണായക നടപടി.
കഴിഞ്ഞ ജൂലൈ 15-നാണ് സജിത്തിന്റെ ഫോണിലേക്ക് എം.എല്‍.എയുടെ ഓഫീസില്‍ നിന്നാണെന്നും പി.എ ആണെന്നും പറഞ്ഞ് സുരേഷ് വിളിക്കുന്നത്. എം.എല്‍.എയുടെ വീടിനടുത്തുള്ള ചേച്ചിക്ക് അടിയന്തരമായി ഡയാലിസിസ് ചെയ്യാൻ പണത്തിന് ബുദ്ധിമുട്ടുണ്ടെന്നും എത്രയും വേഗം ഗൂഗിള്‍ പേ വഴി പണം അയച്ചു നല്‍കണമെന്നുമായിരുന്നു ആവശ്യപ്പെട്ടത്.
എന്നാല്‍ ഫോണ്‍ സംഭാഷണത്തില്‍ സംശയം തോന്നിയ സജിത്ത് പണം അയക്കാതെ ഉടൻ തന്നെ പെരുമ്പാവൂർ പോലീസില്‍ പരാതി നല്‍കുകയായിരുന്നു.അറസ്റ്റിലായ സുരേഷ് സ്ഥിരം തട്ടിപ്പുകാരനാണെന്ന് പോലീസ് വ്യക്തമാക്കി.
കാട്ടാക്കട, പെരുമ്പാവൂർ, കുറുപ്പംപടി, കോട്ടപ്പടി, കോടാട്, കോതമംഗലം തുടങ്ങിയ പോലീസ് സ്റ്റേഷൻ അതിർത്തികളിലായി ഇയാള്‍ക്കെതിരെ നിരവധി കേസുകള്‍ നിലവിലുണ്ട്.
കാട്ടാക്കടയിലും സമാനമായ രീതിയില്‍ പ്രമുഖരുടെ പേരുപറഞ്ഞു തട്ടിപ്പ് നടത്തിയതിന് ഇയാള്‍ക്കെതിരെ കേസുണ്ട്.
