മൂന്ന് വ്യത്യസ്ത കഥകളിലൂടെ മുന്നോട്ടു സഞ്ചരിക്കുന്ന ചിത്രം "ഡെസ്റ്റിനി" പ്രദർശനത്തിനൊരുങ്ങുന്നു. നവനീത് കൃഷ്ണ പ്രൊഡക്ഷൻസിൻ്റെ ബാനറിൽ രജനി രാജശേഖരൻ നായർ നിർമ്മിച്ച് സന്തോഷ് മസ്താൻ, കിഷോർ ആനകോട് എന്നിവർ ചേർന്ന് സംവിധാനം ചെയ്യുന്ന ചിത്രമാണ് ഡെസ്റ്റിനി.
തൻ്റെ മുൻകാല മോശം പ്രവർത്തികളിൽ പശ്ചാത്തപിക്കുന്ന സിഐ ജയശീലനെന്ന പോലീസുദ്യോഗസ്ഥൻ്റെ മനോവ്യാപാരങ്ങളിലൂടെ സഞ്ചരിക്കുന്നതാണ് ആദ്യകഥ.
കവിയും സാംസ്കാരിക പ്രവർത്തകനുമായ നരേന്ദ്രനാഥിൻ്റെ ശിഥിലമായിപ്പോയ കുടുംബ ബന്ധത്തെ അതിന് വഴിയൊരുക്കിയവർ തന്നെ കൂട്ടിയോജിപ്പിക്കുന്നതിലൂടെ തിരിച്ചറിവിൻ്റെയും തെറ്റുതിരുത്തലിൻ്റെയും മഹത്തായ സന്ദേശമൊരുക്കുന്നതാണ് രണ്ടാമത്തെ കഥ.
അനാഥനായ കലാകാരൻ ശന്തനുവും മെയ്ഫ്ളവറും തമ്മിലുള്ള കടുത്ത പ്രണയവും തുടർന്നുണ്ടാകുന്ന ദാരുണമായ അന്ത്യവും വരച്ചുകാട്ടുന്നതാണ് മൂന്നാമത്തെ കഥ.
പുതുമുഖം നവനീത് കൃഷ്ണ നായകനാകുന്ന ചിത്രത്തിൽ രാജശേഖരൻ നായർ, ബിജു കലാവേദി, ബിജുലാൽ പോത്തൻകോട്, പ്രദീപ് രാജ്, എമിൽ,അർച്ചന ദേവി, ആർച്ച എസ് നായർ, നജീന ആലംകോട്, കവിത തുടങ്ങിയവരാണ് അഭിനേതാക്കൾ.
ചിത്രത്തിൻ്റെ രചന നിർവ്വഹിച്ചിരിക്കുന്നത് സന്തോഷ് കൃഷ്ണ, കിഷോർ ആനാകോട് എന്നിവരാണ്. ഛായാഗ്രഹണം മനു ഗോകുലും ബിജുലാൽ പോത്തൻകോടുമാണ്. മേക്കപ്പ് - വിധു ബാബു, ആർട്ട് - അജി ഏഴാം മൈൽ, എഡിറ്റിംഗ് - വിഎസ് സജി, ബിനു, പ്രൊഡക്ഷൻ കൺട്രോളർ- അജയ്ഘോഷ് പരവൂർ, പിആർഓ - അജയ് തുണ്ടത്തിൽ.
