കോട്ടയം: വ്യാജ മെയിൽ ട്രാൻസ്ഫർ ഫോമുകളും റേഷൻ കാർഡും ഉപയോഗിച്ച് കോട്ടയം ജില്ലാ സഹകരണ ബാങ്കിന്റെ പ്രധാന ശാഖയിൽ നിന്ന് 4.50 ലക്ഷം രൂപ തട്ടിയെടുത്ത കേസിൽ ഒന്നും രണ്ടും പ്രതികൾക്ക് രണ്ടു വർഷം വീതം തടവും പിഴയും ശിക്ഷ വിധിച്ചു.
കോട്ടയം അഡീഷണൽ ഡിസ്ട്രിക്ട് ആൻഡ് സെഷൻസ് കോടതി (IV) ജഡ്ജി ശ്രീമതി സനിത എം.സിയാണ് ശിക്ഷ വിധിച്ചത്.
കോട്ടയം വെസ്റ്റ് പോലീസ് രജിസ്റ്റർ ചെയ്ത കേസിന്റെ തുടർ അന്വേഷണം ക്രൈംബ്രാഞ്ച് കോട്ടയം യൂണിറ്റ് ഏറ്റെടുത്ത് അന്വേഷണം പൂർത്തിയാക്കി കുറ്റപത്രം സമർപ്പിക്കുകയായിരുന്നു. ഇടുക്കി തൊടുപുഴ ഇടിവെട്ടി വില്ലേജ് മലേപ്പറമ്പിൽ വീട്ടിൽ ഫക്രുദീന്റെ മകൻ ഇസ്മായിൽ (ഒന്നാം പ്രതി), കോടിക്കുളം വില്ലേജ് തങ്ങേൽ വീട്ടിൽ കേശവന്റെ മകൻ രാമകൃഷ്ണൻ (രണ്ടാം പ്രതി) എന്നിവരെയാണ് കോടതി കുറ്റക്കാരായി കണ്ടെത്തി ശിക്ഷിച്ചത്.
കോട്ടയം ജില്ലാ സഹകരണ ബാങ്കിൽ നിന്ന് വ്യാജരേഖകൾ ഉപയോഗിച്ച് പണം തട്ടിയെടുക്കാൻ പ്രതികൾ ഗൂഢാലോചന നടത്തിയെന്നാണ് പ്രോസിക്യൂഷൻ കേസ്. ഇസ്മത് എന്നയാളുടെ പേരിൽ വ്യാജമായി തയ്യാറാക്കിയ രണ്ട് മെയിൽ ട്രാൻസ്ഫർ ഫോമുകളും വ്യാജ റേഷൻ കാർഡിന്റെ പകർപ്പും ഉപയോഗിച്ച് പ്രതികൾ ബാങ്കിന്റെ മെയിൻ ബ്രാഞ്ചിൽ പുതിയ സേവിങ്സ് ബാങ്ക് അക്കൗണ്ട് തുറക്കുകയായിരുന്നു.
2002 ഡിസംബർ 24-ന് വ്യാജരേഖകൾ ഹാജരാക്കി ബാങ്ക് അധികൃതരെ തെറ്റിദ്ധരിപ്പിച്ച് അക്കൗണ്ടിലേക്ക് 3,75,000 രൂപ മാറ്റിയെടുത്തു. ഇതിൽ 1,75,000 രൂപ ഫിക്സഡ് ഡെപ്പോസിറ്റായി നിക്ഷേപിക്കുകയും ബാക്കി തുക ചെക്കുകൾ മുഖേന പിൻവലിക്കുകയും ചെയ്തു.
തുടർന്ന് 2003 ജനുവരി 20-ന് മറ്റൊരു വ്യാജ മെയിൽ ട്രാൻസ്ഫർ ഫോം ഹാജരാക്കി 2,50,000 രൂപ കൂടി ഇതേ അക്കൗണ്ടിലേക്ക് മാറ്റി അന്നുതന്നെ ചെക്ക് മുഖേന പിൻവലിച്ചു. പിന്നീട് 2003 ഫെബ്രുവരി 15-ന് ഫിക്സഡ് ഡെപ്പോസിറ്റ് അവസാനിപ്പിച്ച് ഒരു ലക്ഷം രൂപ കൂടി പിൻവലിക്കാനും ശ്രമിച്ചു. ഇത്തരത്തിൽ ആകെ 4,50,000 രൂപ ബാങ്കിന് നഷ്ടമുണ്ടാക്കിയതായാണ് കേസ്.
ഇന്ത്യൻ ശിക്ഷാനിയമത്തിലെ 420, 466, 468, 471, 34 എന്നീ വകുപ്പുകൾ പ്രകാരമാണ് പ്രതികൾക്കെതിരെ കുറ്റം ചുമത്തിയിരുന്നത്. വിചാരണയ്ക്കും വാദപ്രതിവാദങ്ങൾക്കും ശേഷം പ്രതികൾ കുറ്റക്കാരാണെന്ന് കണ്ടെത്തിയ കോടതി, കുറ്റകൃത്യത്തിന്റെ ഗൗരവവും മുൻകൂട്ടി ആസൂത്രണം ചെയ്ത് ക്രിമിനൽ ഗൂഢാലോചനയുടെ അടിസ്ഥാനത്തിൽ നടത്തിയതും പരിഗണിച്ചാണ് ശിക്ഷ വിധിച്ചത്.
ഒന്നും രണ്ടും പ്രതികൾക്ക് ഓരോ കുറ്റത്തിനും രണ്ടു വർഷം വീതം ലളിതതടവും യഥാക്രമം 2,25,000 രൂപയും 5,000 രൂപയും വീതം പിഴയുമാണ് വിധിച്ചത്. എല്ലാ തടവുശിക്ഷകളും ഒരുമിച്ച് അനുഭവിച്ചാൽ മതിയാകും.
ആകെ പിഴത്തുകയായ 4,50,000 രൂപ യഥാർത്ഥ പരാതിക്കാരന് നഷ്ടപരിഹാരമായി നൽകാനും കോടതി ഉത്തരവിട്ടു. ഒന്നാം പ്രതി ഇതിനകം അനുഭവിച്ച 28 ദിവസത്തെയും രണ്ടാം പ്രതി അനുഭവിച്ച 41 ദിവസത്തെയും തടവുകാലം ശിക്ഷയിൽ ഇളവായി അനുവദിച്ചിട്ടുണ്ട്.
കോട്ടയം ക്രൈംബ്രാഞ്ച് യൂണിറ്റ് ഇൻസ്പെക്ടർമാരായ ഉല്ലാസ് കുമാർ, പൗലോസ് വി.ഐ., സോണി ഉമ്മൻകോശി, രമേശൻ കെ.എ., അനിൽകുമാർ വി.എസ്., ഡിവൈ.എസ്.പി. ടി.എൻ. വിനോദ് കുമാർ എന്നിവർ അന്വേഷണം നടത്തി കുറ്റപത്രം സമർപ്പിച്ച കേസിൽ പ്രോസിക്യൂഷനുവേണ്ടി അഡ്വ. പി. വിനോദ്ജി ഹാജരായി.
