ട്രെയിനിന് മുന്നില്‍ ചാടി യുവതിയുടെ ആത്മഹത്യാ ശ്രമം; സാഹസികമായി രക്ഷപ്പെടുത്തി പൊലീസ്
സ്വന്തം ലേഖിക
തിരുവനന്തപുരം: ട്രെയിനിന് മുന്നില്‍ ചാടി ചെയ്യാനൊരുങ്ങിയ യുവതിയെ തന്ത്രപരമായി രക്ഷപെടുത്തി പൊലീസ്.
കഴിഞ്ഞ ദിവസം വൈകീട്ട് മൂന്നു മണിയോടെ പേട്ട റെയില്‍വേ ട്രാക്കിലാണ് നാടകീയ സംഭവങ്ങള്‍ അരങ്ങേറിയത്. പൊലീസ് നടത്തിയ നയപരമായ നീക്കത്തിലൂടെ തലനാരിഴയ്ക്കാണ് യുവതിയുടെ ജീവന്‍ രക്ഷിച്ചത്.
Whatsapp Group 1 | Whatsapp Group 2 |Telegram Group
വീട്ടില്‍ നിന്നും ഭര്‍ത്താവുമായി പിണങ്ങി വീടുവിട്ടിറങ്ങിയതായിരുന്നു മണ്ണന്തല സ്വദേശിനിയായ യുവതി . വീട്ടില്‍ നിന്നും ഇറങ്ങിയ ഇവര്‍ ആദ്യം പേട്ട റെയില്‍വേ സ്റ്റേഷനില്‍ ആണ് എത്തിയത്. തുടര്‍ന്ന് റെയില്‍വേ ട്രാക്കിലേക്ക് ഇറങ്ങിയ യുവതി തമ്പാനൂര്‍ ഭാഗത്തേക്ക് നടക്കുകയായിരുന്നു.
യുവതിയുടെ നടത്തത്തില്‍ പന്തികേട് തോന്നിയ പരിസരവാസികള്‍ വഞ്ചിയൂര്‍ പൊലീസില്‍ വിവരം അറിയിച്ചു. വിവരം ലഭിച്ച ഉടന്‍ വഞ്ചിയൂര്‍ പൊലീസ് സ്ഥലത്തേക്ക് പാഞ്ഞെത്തി.
അപ്പോഴേക്കും യുവതി നടന്ന് ഉപ്പിടാംമൂട് പാലത്തിന് അടുത്തു വരെ എത്തിയിരുന്നു. ഇതിനിടെ പിന്നാലെ, പൊലീസും എത്തി. തന്‍റെ പിന്നാലെ പൊലീസ് വരുന്നതു കണ്ടതോടെ യുവതി വേഗത്തില്‍ മുന്നോട്ട് ഓടിത്തുടങ്ങി. ഈ സമയം തമ്പാനൂര്‍ റെയില്‍വേ സ്റ്റേഷനില്‍ നിന്ന് കൊച്ചുവേളി ഭാഗത്തേക്ക് ഒരു ട്രെയിന്‍ വരുന്നുണ്ടായിരുന്നു. വേഗതയിലായിരുന്നു ട്രെയിനിന്‍റെ വരവ്. യുവതിയെ പിടിച്ചുമാറ്റാനായി പിറകെ ഓടിയ പൊലീസുകാര്‍ കൈ ഉയര്‍ത്തി ട്രെയിന്‍ നിര്‍ത്താന്‍ ആഗ്യം കാണിച്ചു കൊണ്ടിരുന്നു.
റെയില്‍വേ ട്രാക്കില്‍ യുവതിയെയും അവര്‍ക്ക് പിന്നാലെ പൊലീസുകാര്‍ ഓടുന്നതും കണ്ട ലോക്കോ പൈലറ്റ് ട്രെയിന്‍റെ വേഗത കുറയ്ക്കുകയും പെട്ടെന്ന് തന്നെ ബ്രേക്കിടുകയും ചെയ്‍തു. വേഗത്തില്‍ വരികയായിരുന്ന ട്രെയിന്‍ യുവതിക്ക് ഏകദേശം തൊട്ടടുത്ത് എത്തിയ ശേഷം ആണ് നിന്നത്.
ഇതോടെ, പിറകെ എത്തിയ പൊലീസുകാര്‍ യുവതിയെ പിടികൂടി പൊലീസ് സ്റ്റേഷനില്‍ എത്തിച്ചു. തുടര്‍ന്ന് ഭര്‍ത്താവിനെയും ബന്ധുക്കളെയും വിളിച്ചുവരുത്തി ഒപ്പം വിട്ടയക്കുകയായിരുന്നു.
