തളിപ്പറമ്പ് : എസ്.ഐ ഉള്‍പ്പെടെയുള്ള പോലീസുകാരെ വധിക്കാൻ ശ്രമിക്കുകയും പോലീസ് വാഹനം തകർക്കുകയും ചെയ്ത കേസ് പിൻവലിക്കാനുള്ള സംസ്ഥാന സർക്കാരിന്റെ നീക്കം തളിപ്പറമ്പ് അഡീ. സെഷൻസ് കോടതി ജഡ്ജി കെ.എൻ.പ്രശാന്ത് തടഞ്ഞു. കേസിലെ പ്രതികളായ 13 സി.പി.എമ്മുകാരും വിചാരണ നേരിടണമെന്ന് സർക്കാരിന്റെ ഹർജി തള്ളിക്കൊണ്ട് കോടതി പ്രഖ്യാപിച്ചു. 2015 സപ്തംബർ 17നാണ് കേസിനാസ്പദമായ സംഭവം.
രാമന്തളി സെന്ററിന് സമീപം സി.പി.എം-എസ്.ഡി.പി.ഐ പ്രവർത്തകർ തമ്മില്‍ സംഘർഷം നടക്കുന്നതായി വിവരം ലഭിച്ചതിനെത്തുടർന്ന് സ്ഥലത്തെത്തി മടങ്ങുകയായിരുന്ന അന്നത്തെ പഴയങ്ങാടി എസ്.ഐ: കെ.പി.ഷൈനിന്റെ നേതൃത്വത്തിലുള്ള പഴയങ്ങാടി പോലീസ് സ്റ്റേഷനിലെ പോലീസുകാരാണ് വധശ്രമത്തിനിരയായത്. രാത്രി 8.05 ഓടെ രാമന്തളി കുന്നരു ഗോള്‍ഡ് റഷ് ആർട്‌സ് ആന്റ് സ്‌പോർട്‌സ് ക്ലബിന്റെ സമീപത്തെ റോഡില്‍ സംഘടിച്ച 25 ഓളം സി.പി.എമ്മുകാർ പോലീസുകാർ സഞ്ചരിച്ച ടാറ്റ സുമോ വാഹനം തടയുകയായിരുന്നു.
തുടർന്ന് എസ്.ഐ: ഷൈൻ, സീനിയർ സി.പി.ഒ: എം.ബി.പ്രമോദ്, സി.പി.ഒ: ടി.വി.സുനില്‍കുമാർ എന്നിവരെ ആക്രമിച്ചു. കെ.എല്‍ 01 ബി.ആർ 9527 പോലീസ് വാഹനം വടിവാള്‍ കൊണ്ട് വെട്ടി നശിപ്പിക്കുകയും ചെയ്തുവെന്നാണ് കേസ്. വാഹനത്തിന് 60,000 രൂപയുടെ നാശനഷ്ടവും സംഭവിച്ചു. ടി.വി.അനൂപ്, സത്യൻ, ജിതിൻ, ദിനേശൻ, പ്രവീണ്‍ തുടങ്ങിയ 13 സി.പി.എമ്മുകാരാണ് കേസില്‍ പ്രതികള്‍.
Whatsapp Group 1 | Whatsapp Group 2 |Telegram Group
2016ല്‍ ഒന്നാം പിണറായി വിജയൻ സർക്കാർ അധികാരമേറ്റതിന് പിറകെയാണ് കേസ് പിൻവലിക്കാൻ നീക്കം തുടങ്ങിയത്. ആഭ്യന്തര സെക്രട്ടറി വഴി ജില്ലാ കലക്ടറാണ് കേസ് പിൻവലിക്കാൻ കോടതിയില്‍ അപേക്ഷ നല്‍കിയത്. കേസ് പരിഗണിച്ച ഓരോ ഘട്ടത്തിലും ജഡ്ജി പിൻവലിക്കാനുള്ള നീക്കത്തെ ചോദ്യംചെയ്തിരുന്നു. പ്രോസിക്യൂഷന്റെയും പ്രതിഭാഗത്തിന്റെയും വിശദമായ വാദം കേട്ട ശേഷമാണ് കേസ് പിൻവലിക്കണമെന്ന സർക്കാരിന്റെ അപേക്ഷ കോടതി തള്ളിയത്.
കേസിലെ ഒന്നാം പ്രതി അനൂപ് 302 ഉള്‍പ്പെടെ 11 കേസില്‍ പ്രതിയാണ്. മറ്റൊരു പ്രതിയായ സത്യൻ 302 ഉള്‍പ്പെടെ നിരവധി കേസില്‍ പ്രതിയാണ്. നാലാം പ്രതി ജിതിൻ 307 ഉള്‍പ്പെടെ 14 കേസിലും മറ്റൊരു പ്രതി ദിനേശൻ 307 ഉള്‍പ്പെടെ 17 കേസിലും പ്രവീണ്‍ നിരവധി കേസിലും ബിനേഷ് അഞ്ച് കേസിലും പ്രതിയാണ്. ഇക്കാര്യം വിധിന്യായത്തില്‍ എടുത്തുകാട്ടിയ കോടതി എന്ത് പൊതുതാല്‍പര്യമാണ് കേസ് പിൻവലിക്കുന്നതിന് പിറകിലുള്ളതെന്ന് ചോദിച്ചു.
സംസ്ഥാന നിയമസഭ അടിച്ചുപൊളിച്ച കേസില്‍ കേസ് പിൻവലിക്കാനുള്ള സംസ്ഥാന സർക്കാരിന്റെ നീക്കം ഹൈക്കോടതിയും സുപ്രീംകോടതിയുമുള്‍പ്പെടെ തടഞ്ഞ കാര്യം കോടതി എടുത്തുകാട്ടി. ഭരണഘടന തത്വത്തിന്റെയും സാമൂഹ്യനീതിയുടെയും ലംഘനമായിരിക്കും കേസ് പിൻവലിക്കുന്നതെന്ന് ഭരണഘടന ദിനത്തിൽ പുറപ്പെടുവിച്ച സുപ്രധാന വിധിയില്‍ കോടതി വ്യക്തമാക്കി. കേസിലെ 13 പ്രതികളില്‍ അഞ്ചുപേർ കോടതിയില്‍ ഹാജരായിരുന്നു
