സ്കൂൾ തുറക്കാറായപ്പോഴേക്കും നാഗമ്പടം മുനിസിപ്പൽ പാർക്ക് തുറന്ന് കൊടുത്ത് കോട്ടയം നഗരസഭ; ഭരണാധികാരികൾ ഉറക്കമുണർന്നത് പാർക്ക് തുറന്ന് നല്കണമെന്നാവശ്യപ്പെട്ട് തേർഡ് ഐ ന്യൂസ് ഹൈക്കോടതിയെ സമീപിച്ചതോടെ
സ്വന്തം ലേഖകൻ
കോട്ടയം: മാർച്ച് അവസാനം അടച്ച സ്കൂളുകൾ തുറക്കാറായപ്പോഴേക്കും നാഗമ്പടം മുനിസിപ്പൽ പാർക്ക് തുറന്ന് കൊടുക്കാൻ തീരുമാനമെടുത്ത് കോട്ടയം നഗരസഭ.
കോവിഡ് നിയന്ത്രണങ്ങൾ സർക്കാൻ പിൻവലിച്ചപ്പോൾ തന്നെ പാർക്ക് തുറക്കണമെന്നാവശ്യപ്പെട്ട് നിരവധി വ്യക്തികളും സംഘടനകളും നഗരസഭാ അധികാരികളെ സമീപിച്ചെങ്കിലും അധികാരികൾ കേട്ട ഭാവം നടിച്ചില്ല.
Whatsapp Group 1 | Whatsapp Group 2 |Telegram Group
പാർക്ക് തുറന്ന് നല്കണമെന്നും, മിതമായ നിരക്കിൽ അവധിക്കാലം ആഘോഷിക്കാനുള്ള സാഹചര്യമൊരുക്കണമെന്നുമാവശ്യപ്പെട്ട് തേർഡ് ഐ ന്യൂസ് ഹൈക്കോടതിയെ സമീപിച്ചതോടെയാണ് നഗരസഭാ അധികാരികൾ ഉറക്കമുണർന്നത്.
ആറ് വർഷമായി അടഞ്ഞുകിടക്കുന്ന പാർക്ക് നാശത്തിന്റെ വക്കിലാണെന്നും കോട്ടയത്തെ സാധാരണക്കാരുടെ ഒഴിവ് സമയങ്ങൾ ചിലവഴിക്കാനുള്ള ബുദ്ധിമുട്ടും സ്വകാര്യ പാർക്കിലെ അന്യായ ചാർജും ചൂണ്ടിക്കാണിച്ച് തേർഡ് ഐ ന്യൂസ് ചീഫ് എഡിറ്റർ ഏ.കെ ശ്രീകുമാർ ഏപ്രിൽ ഏഴിന് നല്കിയ ഹർജിയിൻമേൽ പാർക്ക് തുറന്ന് കൊടുക്കാൻ ജസ്റ്റിസ് അനു ശിവരാമൻ ഉത്തരവിടുകയായിരുന്നു.
കളി ഉപകരണങ്ങൾ, വാട്ടർ സിസ്റ്റം, മറ്റ് അടിസ്ഥാന സൗകര്യങ്ങൾ എന്നിവയുടെ പോരായ്മകൾ പരിഹരിച്ച ശേഷമാണ് പാർക്ക് തുറന്നു നൽകുന്നത് .
വൈകിട്ട് 3 മുതൽ 8 വരെയാണ് പാർക്കിന്റെ പ്രവർത്തന സമയം . അഞ്ച് വയസു വരെയുള്ള കുട്ടികൾക്ക് പ്രവേശനം സൗജന്യമായിരിക്കും. മുതിർന്ന കുട്ടികൾക്ക് പന്ത്രണ്ട് രൂപയും, മറ്റുള്ളവർക്ക് ഇരുപത്തിനാല് രൂപയുമാണ് പ്രവേശന ഫീസ്. ഇന്ന് എല്ലാ സന്ദർശകർക്കും പ്രവേശനം സൗജന്യമായിരിക്കും