മീഡിയവണ്‍ കേസ്; ഹർജികളില്‍ മറുപടി സമര്‍പ്പിക്കാന്‍ കൂടുതല്‍ സമയം വേണമെന്ന് കേന്ദ്രം
സ്വന്തം ലേഖകൻ
ന്യൂഡല്‍ഹി: മീഡിയവണ്‍ ചാനലിന് ഏര്‍പ്പെടുത്തിയ വിലക്കിനെതിരെ ഉടമസ്ഥരായ ‘മാധ്യമം ബ്രോഡ്കാസ്റ്റിങ് ലിമിറ്റഡ്’ അടക്കമുള്ളവര്‍ സമര്‍പ്പിച്ച ഹർജികളില്‍ മറുപടി സത്യവാങ്മൂലം സമര്‍പ്പിക്കാന്‍ കൂടുതല്‍ സമയം അനുവദിക്കണമെന്ന് കേന്ദ്ര സര്‍ക്കാര്‍ സുപ്രീംകോടതിയില്‍ ആവശ്യപ്പെട്ടു.
മറുപടി സത്യവാങ്മൂലത്തിന്‍റെ ഉള്ളടക്കം എന്തായിരിക്കണമെന്ന് ഏറ്റവും മുതിര്‍ന്ന തലത്തില്‍ തീരുമാനിക്കാനുള്ളതാണെന്നും അതിന് സമയമെടുക്കുമെന്നും അതിനാല്‍ നാലാഴ്ച കൂടി സത്യവാങ്മൂലത്തിന് നല്‍കണമെന്നും കേന്ദ്ര സര്‍ക്കാര്‍ ബോധിപ്പിച്ചു.
Whatsapp Group 1 | Whatsapp Group 2 |Telegram Group
വ്യാഴാഴ്ച അന്തിമ വാദത്തിനായി ഹർജികള്‍ പരിഗണിക്കാനിരിക്കേയാണ് കൂടുതല്‍ സമയം ചോദിച്ച്‌ ബുധനാഴ്ച കേന്ദ്ര സര്‍ക്കാര്‍ സുപ്രീംകോടതി രജിസ്ട്രിക്ക് കത്ത് നല്‍കിയത്.
ജസ്റ്റിസുമാരായ ഡി.വൈ. ചന്ദ്രചൂഡ്, സഞജീവ് ഖന്ന, സൂര്യകാന്ത് എന്നിവരടങ്ങുന്ന ബെഞ്ച് നാലാം നമ്പര്‍ കോടതിയില്‍ 14ാമത്തേതായി വാദം കേള്‍ക്കാനുള്ള കേസുകളുടെ പട്ടികയില്‍ മീഡിയവണ്‍ കേസ് ഉള്‍പ്പെടുത്തിയിട്ടുണ്ടെന്നും ജഡ്ജിമാര്‍ക്കുണ്ടാകുന്ന പ്രയാസം ഒഴിവാക്കാന്‍ ഈ കത്ത് അവര്‍ക്ക് കൈമാറണമെന്നും കേന്ദ്ര സര്‍ക്കാര്‍ രജിസ്ട്രിയോട് ആവശ്യപ്പെട്ടു.
