സ്വന്തം ലേഖിക
കോട്ടയം: ഡ്രൈവിംഗിനിടയിലെ നിയമലംഘനം പിടികൂടാന്‍ മോട്ടോര്‍ വാഹന വകുപ്പ് ജില്ലയില്‍ 44 ഇടങ്ങളിലായി സ്ഥാപിച്ച ആര്‍ട്ടിഫിഷല്‍ ഇന്‍റലിജന്‍റ്സ് ക്യാമറകൾ പടമെടുക്കും പക്ഷേ, നടപടിയില്ല.
നടത്തിപ്പ് ചുമതലയുള്ള കെല്‍ട്രോള്‍ ഉദ്യോഗസ്ഥര്‍ എത്താത്തതിനാലാണു നടപടികള്‍ വൈകുന്നതെന്നാണു മോട്ടോര്‍ വാഹന വകുപ്പിന്‍റെ ഔദ്യോഗിക വിശദീകരണം.
കേന്ദ്രസര്‍ക്കാരിന്‍റെ അനുമതി വൈകുന്നതും കാരണമായി പറയുന്നുണ്ട്.
Whatsapp Group 1 | Whatsapp Group 2 |Telegram Group
ഫെബ്രുവരി, മാര്‍ച്ച്‌ മാസങ്ങളിലായാണു ക്യാമറകള്‍ സ്ഥാപിച്ചത്. ഏപ്രില്‍ ഒന്നിനു പ്രവര്‍ത്തിച്ചു തുടങ്ങുമെന്നായിരുന്നു അറിയിച്ചിരുന്നത്. അന്നുമുതല്‍ ചിത്രമെടുത്തു തുടങ്ങിയതല്ലാതെ നടപടികളൊന്നുമുണ്ടായിട്ടില്ല.
ജില്ലയില്‍ നഗരപ്രദേശങ്ങള്‍ കേന്ദ്രീകരിച്ചും പ്രധാന റോഡുകളിലുമാണ് കാമറകള്‍ സ്ഥാപിച്ചത്. കോട്ടയത്ത് ചവിട്ടുവരി, നാഗമ്പടം, കഞ്ഞിക്കുഴി, കോടിമത, കുമരകം റോഡ് തുടങ്ങിയ സ്ഥലങ്ങളില്‍ ക്യാമറകള്‍ സ്ഥാപിച്ചിട്ടുണ്ട്.
മൊബൈലില്‍ സംസാരിച്ചും ഹെല്‍മെറ്റ്, സീറ്റ് ബെല്‍റ്റ് എന്നിവ ധരിക്കാതെയും വാഹനമോടിക്കുക, ഇരുചക്ര വാഹനങ്ങളില്‍ മൂന്നുപേര്‍ യാത്ര ചെയ്യുക, മറ്റുള്ളവര്‍ക്ക് അപകടമുണ്ടാക്കുന്ന വിധത്തില്‍ വണ്ടിയോടിക്കുക തുടങ്ങിയ നിയമലംഘനങ്ങള്‍ പിടിക്കാനാണ് ക്യാമറകള്‍. കാറില്‍ മുന്‍സീറ്റിലെ രണ്ടുപേരും സീറ്റ് ബെല്‍റ്റ് ധരിക്കണമെന്ന നിയമം ലംഘിച്ചാലും പിടി വീഴും. കാമറകള്‍ ഒപ്പിയെടുക്കുന്ന ചിത്രങ്ങള്‍ കോട്ടയത്തെയും തിരുവനന്തപുരത്തെയും കണ്‍ട്രോള്‍ റൂമില്‍ ലഭ്യമാകും. ഇവിടെനിന്നുമാണ് പിഴത്തുക അടങ്ങിയ നോട്ടീസ് നല്‍കുക.
വാഹനത്തിന്‍റെ നമ്പരിന്‍റെ അടിസ്ഥാനത്തില്‍ ഉടമയുടെ വീട്ടിലേക്കു നോട്ടീസ് എത്തും. 24 മണിക്കൂറും പ്രവര്‍ത്തിക്കുന്നവയായതിനാല്‍ രാത്രികാല നിയമലംഘകര്‍ക്കും പിടിവീഴും.
നിലവില്‍ മോട്ടോര്‍ വാഹന വകുപ്പിന്‍റെ സ്ക്വാഡുകളും ഇന്‍റര്‍സെപ്റ്റര്‍ വാഹനവും ഉപയോഗിച്ചാണ് ഇത്തരം നിയമ ലംഘകരെ പിടികൂടുന്നത്. പോലീസും പരിശോധന നടത്താറുണ്ട്. ഇതു പലപ്പോഴും തര്‍ക്കങ്ങളില്‍ കലാശിക്കും. മാത്രമല്ല, ചിലര്‍ക്ക് ഇളവു കൊടുക്കുന്നതും പരാതിക്കു കാരണമാകാറുണ്ട്.
