കാലടിയിൽ വൻ പെൺവാണിഭ സംഘം പിടിയിൽ; പിടിയിലായത് ഇടപാടുകാരനും നടത്തിപ്പുകാരും ഉൾപ്പെടെ അഞ്ചുപേർ; സംഘത്തിൽ 22 വയസുള്ള മധ്യപ്രദേശ് സ്വദേശിനിയും

സ്വന്തം ലേഖകൻ

കൊച്ചി: കാലടിയിൽ വൻ പെൺവാണിഭ സംഘം പിടിയിൽ. മറ്റൂർ ജങ്ഷനിൽ എയർപോർട്ട് റോഡിലെ ഗ്രാന്റ് റസിഡൻസിയിൽ നിന്നാണ് ഇടപാടുകാരനും നടത്തിപ്പുകാരും ഉൾപ്പെടെ അഞ്ചുപേരെ അറസ്റ്റ് ചെയ്തത്. ഇവരോടൊപ്പം ഉണ്ടായിരുന്ന 22 വയസുള്ള മധ്യപ്രദേശ് സ്വദേശിനിയെയും കസ്റ്റഡിയിലെടുത്തിട്ടുണ്ട്.

ഇടപാടുകാരനായ കൊല്ലം പവിത്രേശ്വരം പുത്തൂർ അകവൂർ മഠത്തിൽ ജഗൻ (24), നടത്തിപ്പുകാരായ മൂക്കന്നൂർ കോട്ടയ്ക്കൽ എബിൻ (33), വേങ്ങൂർ ഇളമ്പകപ്പിള്ളി കല്ലുമാലക്കുടിയിൽ നോയൽ (21), പയ്യന്നൂർ തായിനേരി ഗോകുലത്തിൽ ധനേഷ് (29), രായമംഗലം പറമ്പത്താൻ സുധീഷ് (36) എന്നിവരെയാണ് കാലടി പോലീസ് അറസ്റ്റ് ചെയ്തത്.

പന്ത്രണ്ടായിരം രൂപയാണ് സംഘം ഇടപാടുകാരിൽനിന്നും വാങ്ങിയിരുന്നത്. സുധീഷും ധനീഷും ലോഡ്ജ് നടത്തിപ്പുകാർ കൂടിയാണ്. ഇവിടെ പെൺവാണിഭം നടക്കുന്നതായി ജില്ലാ പോലീസ് മേധാവി കെ. കാർത്തിക്കിന് ലഭിച്ച രഹസ്യവിവരത്തെ തുടർന്ന് ലോഡ്ജ് നിരീക്ഷണത്തിലായിരുന്നു. തുടർന്നായിരുന്നു ഇവരുടെ അറസ്റ്റ്.

ഇൻസ്പെക്ടർ ബി.സന്തോഷ്, എസ്.ഐമാരായ ജയിംസ് മാത്യു, എൻ.വി. ബാബു, എ.എസ്.ഐ അബ്ദുൾ സത്താർ, എസ്.സി.പി. ഒ അനിൽകുമാർ, സി.പി. ഒ മാരായ രഞ്ജിത്, സിദ്ദിഖ്, അമൃത, ധനീഷ്, എൽദോസ് എന്നിവരാണ് റെയ്ഡിൽ പങ്കെടുത്തത്. സംഭവം പ്രത്യേക ടീം അന്വേഷിക്കുമെന്ന് എസ്.പി കെ. കാർത്തിക്ക് പറഞ്ഞു.