തൃശ്ശൂർ (കൈപ്പറമ്പ്): കൈപ്പറമ്പ് പഞ്ചായത്ത് 18-ാം വാർഡിലെ സിപിഎം സ്ഥാനാർഥി അഖിലാ പ്രസാദിന്റെ വീടിനുനേരേ തിങ്കളാഴ്ച രാത്രി അജ്ഞാതരുടെ ആക്രമണം. ശനിയാഴ്ച രാത്രി അപരിചിതരായ രണ്ടുപേർ വീട്ടിൽ വന്ന് തിരഞ്ഞെടുപ്പിൽ മത്സരിക്കരുതെന്ന് ഭീഷണിപ്പെടുത്തിയിരുന്നതായി അഖില പറഞ്ഞു. തുടർന്ന് പേരാമംഗലം പോലീസ് സ്റ്റേഷനിൽ പരാതി നൽകി. ഇതിനു പിന്നാലെയാണ് തിങ്കളാഴ്ച വീടിനുനേരേ ആക്രമണമുണ്ടായത്. വീട്ടിൽ അഖിലാ പ്രസാദും രണ്ടുമക്കളും മാത്രമാണ് താമസം.
വീട്ടിലെ ചെടിച്ചട്ടികൾ തകർത്തിട്ടുണ്ട്. ഇരുചക്രവാഹനം മറിച്ചിട്ട നിലയിലാണ്. കൈപ്പറമ്പ് ഏഴാംകല്ലിലാണ് അഖിലാ പ്രസാദിന്റെ വീട്. ചൊവ്വാഴ്ച രാവിലെ വാതിൽ തുറന്നപ്പോളാണ് ആക്രമണം വീട്ടുകാരുടെ ശ്രദ്ധയിൽപ്പെട്ടത്. പേരാമംഗലം പോലീസ് വീട്ടിലെത്തി പരിശോധന നടത്തി കേസെടുത്തിട്ടുണ്ട്.
സമീപത്തെ സിസിടിവി ദൃശ്യങ്ങൾ കേന്ദ്രീകരിച്ചാണ് അന്വേഷണം. കാരണം വ്യക്തമല്ലെന്നാണ് പോലീസ് പറയുന്നത്. അഖിലാ പ്രസാദ് നിലവിൽ 16-ാം വാർഡിലെ പഞ്ചായത്ത് അംഗമാണ്. ശക്തമായ ത്രികോണമത്സരം നടക്കുന്നതുകൊണ്ട് ആക്രമണത്തിനുപിന്നിൽ എതിർപാർട്ടിക്കാരെ സംശയിക്കുന്നതായി സിപിഎം പ്രാദേശികനേതൃത്വം ആരോപിച്ചു.
Whatsapp Group 1 | Whatsapp Group 2 |Telegram Group