ആലപ്പുഴയിലുണ്ട്, ഒരേ വിലാപമുയരുന്ന രണ്ട് വീടുകള്‍; ആൾക്കുട്ടങ്ങൾ ഒഴിഞ്ഞു പോകുമ്പോൾ തനിച്ചാകുന്ന രണ്ട് കുടുംബങ്ങൾ; ആ കണ്ണീരിന് ഇനി ആര് സമാധാനം പറയും?
സ്വന്തം ലേഖിക
ആലപ്പുഴ: ആലപ്പുഴയില്‍ കൊല്ലപ്പെട്ട കെ എസ് ഷാനിന്‍റെയും രഞ്ജിത്ത് ശ്രീനിവാസന്‍റെയും അന്ത്യകര്‍മ്മ സമയത്ത് ഉയര്‍ന്നുകേട്ട വിലാപങ്ങളില്‍ വെറുപ്പിന്‍റെയും പ്രതിരോധത്തിന്‍റെയും രാഷ്ട്രീയത്തോടുള്ള ചോദ്യങ്ങളുമുണ്ട്.
ശനിയാഴ്ച രാത്രി എട്ട് മണിയോടെ നഗരത്തില്‍നിന്നും മണ്ണഞ്ചേരിയിലെ വീട്ടിലേക്കുള്ള യാത്രയിലായിരുന്നു 38കാരനായ ഷാന്. ഷാന് രണ്ട് പെണ്‍മക്കളാണ്, ഹിബയും ഫിദയും. ഉപ്പ വരാന്‍ വൈകിയാല്‍ അവര്‍ മൊബൈല്‍ ഫോണില്‍ നിര്‍ത്താതെ വിളിച്ചുകൊണ്ടിരിക്കും. ആര്.എസ്.എസ് പ്രവര്‍ത്തകര്‍ കാര്‍ ഇടിപ്പിച്ചിട്ട് വെട്ടിവീഴ്ത്തുന്നതിന് തൊട്ടുമുമ്പും ആ പെണ്‍കുഞ്ഞുങ്ങള്‍ അവരുടെ ഉപ്പയെ വിളിച്ചു. ‘ദാ എത്തിക്കഴിഞ്ഞു’ എന്നാണ് അയാള്‍ അവസാനം മക്കള്‍ക്ക് കൊടുത്ത വാക്ക്.
Whatsapp Group 1 | Whatsapp Group 2 |Telegram Group
വീടിന് ഏതാനും വിളിപ്പാടകലെയാണ് ആ യുവാവ് അക്രമികളുടെ വെട്ടേറ്റു പിടഞ്ഞുവീണത്. ആലപ്പുഴ മെഡിക്കല്‍ ട്രസ്റ്റ് ആശുപത്രിയില്‍ എത്തിച്ചെങ്കിലും രാത്രിയോടെ ഷാന് മരണപ്പെട്ടു.
എന്നാൽ അതിലും വേദന സമ്മാനിച്ചായിരുന്നു ആ രാത്രി ഇരുട്ടിവെളുത്തത്.
ആര്.എസ്.എസ്-ബി.ജെ.പി സജീവ പ്രവര്‍ത്തകനും ഒ.ബി.സി മോര്‍ച്ച സംസ്ഥാന സെക്രട്ടറിയുമായ അഡ്വ. രഞ്ജിത് ശ്രീനിവാസനെ വീട്ടിലെത്തിയ അക്രമി സംഘം വെട്ടിക്കൊലപ്പെടുത്തിയിരിക്കുന്നു. നാട് വിറങ്ങലിച്ചുപോയി.
12 മണിക്കൂര്‍ ഇടവേളയില്‍ കേവലം 13 കിലോമീറ്റര്‍ അകലത്തില്‍ രണ്ട് യുവാക്കള്‍ക്ക് ജീവന്‍ നഷ്ടപ്പെട്ടിരിക്കുന്നു. രഞ്ജിത്തിനും രണ്ട് പെണ്‍കുഞ്ഞുങ്ങളാണ്. നാല് പെണ്‍കുഞ്ഞുങ്ങള്‍ അനാഥരാക്കപ്പെട്ടിരിക്കുന്നു. രണ്ട് യുവതികള്‍ അകാല വൈധവ്യത്തിന് ഇരകളായിരിക്കുന്നു. ആലപ്പുഴ പട്ടണത്തില്‍ ചോരയുടെ മണം പടര്‍ന്നിരിക്കുന്നു…
ഷാനിന്‍റെ മൃതദേഹമാണ് പോസ്റ്റുമോര്‍ട്ടം നടപടികള്‍ പൂര്‍ത്തിയാക്കി ആദ്യം വിട്ടുകിട്ടിയത്. എല്‍എല്‍.ബി പൂര്‍ത്തിയാക്കിയെങ്കിലും പ്രാക്ടീസിന് പോകാതെ കര്‍ട്ടന്‍ ബിസിനസ് നടത്തുകയായിരുന്നു ഷാന്. ആലപ്പുഴ നഗരത്തിന് അടുത്ത് പൊന്നാടാണ് താമസം.
ഒരു കുഞ്ഞു വീട്. ഷാന്‍റെ ശരീരം വീട്ടിലെത്തിച്ചപ്പോള്‍ ഭാര്യ ഫന്‍സില നിലവിളിക്കാന്‍ പോലുമാകാതെ നിന്നു. ‘എന്‍റിക്ക പാവമായിരുന്നില്ലേ, എന്നിട്ടും വെട്ടിക്കൊന്നുകളഞ്ഞില്ലേ. ഇക്ക ഇല്ലാത്ത വീട്ടില്‍ ഞാനിനി എന്തിനാ. എന്‍റെ മക്കള്‍ ഇനി എന്തു ചെയ്യും’-വിതുമ്പലടക്കാനാവാതെ ഫന്‍സില പറഞ്ഞു.
ഹിബയും ഫിദയും ‘ദാ എത്തിക്കഴിഞ്ഞു’ എന്ന അവസാന വാക്കിന്‍റെ മണംമായും മുമ്പ് എന്നന്നേക്കുമായി ഉറങ്ങിപ്പോയ ഉപ്പയെ കണ്ട് അലറി വിളിച്ചു.
വാര്‍ധ്യകത്തില്‍ തുണയാകേണ്ടിയിരുന്ന മകന് അന്ത്യകര്‍മങ്ങള്‍ ചെയ്യേണ്ടിവന്നതിന്‍റെ ദുഃഖം താങ്ങാനാകാതെ പിതാവ് സലിം വിതുമ്പി. മറ്റാര്‍ക്കും ബുദ്ധിമുട്ട് ഉണ്ടാക്കുന്ന തരത്തില്‍ പ്രവര്‍ത്തിച്ചവനല്ല മകനെന്ന് മയ്യിത്തിനരികെ നിന്ന് ആ പിതാവ് പറഞ്ഞു.
ആറാട്ടുപുഴ വലിയഴീക്കല്‍ സ്വദേശിയായിരുന്നു അഡ്വ. രഞ്ജിത് ശ്രീനിവാസന്‍. ആലപ്പുഴ ജില്ലാ കോടതിയില്‍ വക്കീല്‍ ആയിരുന്നു. ഭാര്യ ലിഷയും വക്കീലാണ്. സജീവ ആര്.എസ്.എസ്-ബി.ജെ.പി പ്രവര്‍ത്തകന്‍.
ആലപ്പുഴ നഗരത്തിലെ വെള്ളക്കിണര്‍ പ്രദേശത്താണ് താമസിക്കുന്നത്. മൂത്ത മകള്‍ ഭാഗ്യ ഒമ്പതാം ക്ലാസിലും ഇളയ മകള്‍ ഹൃദ്യ ആറാം ക്ലാസിലും പഠിക്കുന്നു.
ഞായറാഴ്ച പുലര്‍ച്ചെ ആറരക്ക് അമ്മ വിലാസിനിക്കും ഭാര്യക്കും ഇളയ മകള്‍ ഹൃദ്യക്കും മുന്നില്‍വെച്ചാണ് ആക്രമി സംഘം രഞ്ജിത്തിനെ വെട്ടി കൊലപ്പെടുത്തിയത്. തിങ്കളാഴ്ച ആലപ്പുഴ മെഡിക്കല്‍ കോളേജില്‍ പോസ്റ്റുമോര്‍ട്ടം പൂര്‍ത്തിയാക്കിയ മൃതദേഹം വെള്ളക്കിണറിലെ വീട്ടില്‍ എത്തിച്ചപ്പോള്‍ ഷാനിന്‍റെ വീട്ടിലേതിന് സമാനമായ നിലവിളികള്‍ തന്നെയാണ് അവിടെയും ഉയര്‍ന്നത്. ഹിബയെയും ഫിദയെയും പോലെ തന്നെ ഭാഗ്യയും ഹൃദ്യയും അച്ഛന്‍റെ ചേതനയറ്റ ദേഹത്തിനുമുന്നില്‍ വാവിട്ട് നിലവിളിച്ചു.
ഹൃദ്യയുടെ അലറിക്കരച്ചില്‍ കേട്ടവരുടെ ഹൃദയം നുറുക്കി.
ഒറ്റപ്പെടലിന്‍റെ എല്ലാ നൊമ്പരങ്ങളും പേറി ലിഷ അലറിക്കരഞ്ഞു. ‘ഏട്ടാ, ഞാനിനി കോടതിയില്‍ പോകില്ല. എനിക്കിനി ഒന്നും പറയാന്‍ കഴിയില്ല. ജോലി നോക്കാന്‍ കഴിയില്ല. നമ്മുടെ കുഞ്ഞുങ്ങളെ ഞാനിനി എന്ത് ചെയ്യണം. അവസാനമായി ഞാന്‍ എന്തുചെയ്യണം എന്നുപോലും പറഞ്ഞില്ല. എനിക്കിനി ഒന്നും ചെയ്യാനാകില്ല. കുഞ്ഞിന്‍റെ അരങ്ങേറ്റത്തിന് ഡ്രസ് എടുക്കാന്‍ പോകാന്‍ ഇരുന്നതല്ലേ, അവളുടെ അരങ്ങേറ്റം കാണണ്ടേ. അയ്യോ എന്തിനാ ഇങ്ങനെ ചെയ്തത്. ഞാന്‍ ഒറ്റക്കായില്ലേ, എത്രയോ പേരെ സഹായിച്ചിട്ടുണ്ട്. സമയത്ത് ആരും ഉണ്ടായില്ലല്ലോ. ഇതൊന്നും ഇഷ്ടമില്ലെന്ന് ഞാന്‍ പറഞ്ഞിരുന്നതല്ലേ ഏട്ടാ, ഇതൊന്നും വേണ്ടാന്ന്. എന്നിട്ടും എന്തിനായിരുന്നു. അയ്യോ ഞാനിനി എന്ത് ചെയ്യും? ഞാന്‍ എന്ത് ചെയ്യണം എന്ന് പറഞ്ഞിട്ട് പോ ഏട്ടാ’-മൃതദേഹം വലിയഴീക്കലിലുള്ള തറവാട് വീട്ടിലേക്ക് എടുക്കുംവരെ ലിഷ നിര്‍ത്താതെ നിലവിളിച്ചു.
ഇരുവീടുകളിലെയും പെണ്ണുങ്ങളില്‍നിന്നും ഉറ്റവരില്‍നിന്നും ഒരേ ആര്‍ത്തനാദങ്ങളാണ് ഉയര്‍ന്നത്. ആ കുഞ്ഞുങ്ങളുടെ നെഞ്ചുലച്ച കരച്ചിലുകള്‍ക്കും ഒരേ സ്വരമായിരുന്നു. ആ ഭാര്യമാർക്ക് അവരുടെ ഭർത്താവിനെ നഷ്ടമായിരിക്കുന്നു. ആ കുഞ്ഞുങ്ങൾക്ക് അവരുടെ അച്ഛനെയും.
കേരളത്തില്‍ ഇന്നോളം നടന്നിട്ടുള്ള രാഷ്ട്രീയ കൊലകളില്‍ ഒക്കെയും ഇത് തന്നെയായിരുന്നു കാഴ്ച. എന്നിട്ടും മാറ്റം ഒന്നും ഉണ്ടായിട്ടില്ല. അടുത്തത് ഇനി ആരെന്ന ഭയത്തിലാണ് സമൂഹം.
