ഓണക്കാലത്ത് സ്കൂള്‍ കുട്ടികള്‍ക്ക് സൗജന്യ അരി; പ്രഖ്യാപിച്ച്‌ വിദ്യാഭ്യാസ വകുപ്പ്; 29.5 ലക്ഷം കുട്ടികളാണ് ഗുണഭോക്താക്കള്‍; വിവരങ്ങള്‍ ഇങ്ങനെ….

സ്വന്തം ലേഖിക

തിരുവനന്തപുരം: ഉച്ചഭക്ഷണ പദ്ധതിയിലുള്‍പ്പെട്ട സ്കൂള്‍ കുട്ടികള്‍ക്ക് ഈ ഓണക്കാലത്ത് 5 കിലോഗ്രാം വീതം സൗജന്യ അരി വിതരണം ചെയ്യാൻ പൊതുവിദ്യാഭ്യാസ വകുപ്പ്.

അരി വിതരണം ചെയ്യാനുള്ള അനുമതി പൊതുവിദ്യാഭ്യാസ ഡയറക്ടര്‍ക്ക് നല്‍കി. കേരള സ്റ്റേറ്റ് സിവില്‍ സപ്ളൈസ് കോര്‍പ്പറേഷന്റെ കൈവശം സ്റ്റോക്ക് ഉള്ള അരിയില്‍ നിന്നാണ് അരി വിതരണം ചെയ്യുക.

അരി സപ്ളൈകോ തന്നെ സ്കൂളുകളില്‍ നേരിട്ട് എത്തിച്ച്‌ നല്‍കും. 29.5 ലക്ഷം കുട്ടികളാണ് ഗുണഭോക്താക്കള്‍.

ഓഗസ്റ്റ് 24നകം വിതരണം പൂര്‍ത്തിയാക്കാനുള്ള നിര്‍ദേശമാണ് സപ്ലൈക്കോയ്ക്ക് നല്‍കിയിരിക്കുന്നതെന്ന് പൊതു വിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടി അറിയിച്ചു.